Өнгөрөгч Баасан гаригт Үндсэн хуулийн цэц Ерөнхийлөгчийн сонгуулийн тухай хуулийн зарим зүйл заалт нь Үндсэн хууль зөрчсөн гэдэг шийдвэрийг гаргасан. Ингэснээр одоогийн Ерөнхийлөгч Х.Баттулга дахин нэр дэвших боломжгүй болсон.

Үүнээс хойш Ерөнхийлөгчийн дэмждэг, багт ажилладаг нэр бүхий хүмүүс болон тэднийг дэмжигчид цахим хуудаснаа “жагсаал цуглаан, бослого үймээнд” уриалсан пост мэдээлэл бичих болсон.

Улмаар Ерөнхийлөгч Х.Баттулга өнөөдөр МАН-ыг тараах захирамж гаргасан бөгөөд захирамж уншиж танилцуулахдаа хэд хэдэн ноцтой үг унагалаа.

Тодруулбал... Төрийн эрх баригч намын зүй бус дарангуйллыг таслан зогсоож буй энэхүү түүхэн үйл хэрэгт хариуцлагатай, нухацтай хандаж, Үндсэн хуулиа дээдлэн хамгаалж, гагцхүү хуульд захирагдан ажиллахыг төрийн нийт албан хаагчдад сануулсугай. Монгол Улсын Ерөнхийлөгчийн шийдвэр, үйл ажиллагаанд улс орныхоо язгуур ашиг сонирхлын үүднээс хандаж, үндэсний эв нэгдлийг сахин хамгаалахыг нийт ард түмэндээ уриалсугай гэжээ. Ерөнхийлөгчийн уншсан хуулийн заалтыг утгачилбал шаардлагатай бол зэвсэгт хүчин босгох тухай утга бас байгаа юм.

Ерөнхийлөгч Х.Баттулгын энэхүү мэдэгдэлтэй холбоотойгоор Ерөнхийлөгч “төрийн эргэлт”, иргэний дайн хийхээр санаархав уу гэх байдлаар олон нийт улстөрчид түрүүчээсээ үзэл бодлоо илэрхийлээд эхэлсэн байна. Асар их шунал, өс хонзондоо баригдсан Х.Баттулга Монголд иргэний дайн үүсгэхийг санаархаж байна, Монгол Улсын Ерөнхийлөгчийн зарлиг хуульд нийцсэн байх ёстой. Ерөнхийлөгч уурлахаараа нам тараадаг Үндсэн хууль, хуульд нийцээгүй  жишиг тогтвол Ардчилал устаж байгаа нь тэх гэх мэтээр иргэд олон нийт жиргээд эхэлжээ.

Угтаа Монгол Улсын Ерөнхийлөгч нь Монгол Улсын эв нэгдлийн илэрхийлэл байх ёстой боловч энэ удаагийн Ерөнхийлөгч Х.Баттулга Зэвсэгт хүчний ерөнхий командлагч гэдгээр түрий барьж МАН-ыг тараах, олон нийтийн итгэл үзүүлж сонгосон олонхийн сонголтыг үгүйсгэн дайрах, олон нийтийг бослого тэмцэлд уриалж эхэлсэн нь эргээд түүнд импичмэнт буюу Ерөнхийлөгчөөс огцруулах нөхцлийг үүсгэж мэдэхээр болж байна.