“Ардчилсан нам АНУ-ын лобби компанитай 50 мянган ам.долларын гэрээ хийсэн” гэх асуудалд АН-аас дараах мэдэгдлийг гаргажээ.

УИХ-ын гишүүн Ц.Тувааны нэр, гарын үсэгтэй хийгдсэн гэрээ гэх баримтыг АН байгуулсан гэж шууд хамаатуулан мэдээлж байгаа нь АН-ын нэр хүндэд халдсан хэрэг болж байна.

Нэгдүгээрт: УИХ-ын гишүүн Ц.Туваан нь АН-ын дарга биш бөгөөд АН-ыг төлөөлөх эрх бүхий албан тушаалтан биш.

Хоёрдугаарт: АН-ын нэрийг барьсан зарим этгээдийн хийсэн үйлдэл байж болох тул цаашид тус намтай холбоотой аливаа байр суурь илэрхийлэхдээ АН-аас албан ёсоор тодруулга авч байхыг хүсье гэжээ.

Ийнхүү Дээд шүүхэд албан ёсны бүртгэлтэй М.Тулгатын АН-аас энэхүү мэдэгдлийг гаргасан бөгөөд цаашид Ц.Туваан нарыг АН-ын нэр хүндийг унагахгүй байхыг хүсч байна гээд намын нэр барьсан бүлэг этгээдүүдийн энэ мэт үйлдлүүдийг хууль хяналтын байгууллагад хандан шалгуулах болно гэдгээ мэдэгджээ.

Уг мэдэгдэлд мөн “Уг гэрээний үйлчилгээ авч дуусах хугацаа нь Ерөнхийлөгчийн сонгуулийн сурталчилгааны дуусах хугацаатай давхцаж, эхлэх хугацаа нь хуулийн хугацаанаас хамаагүй эрт эхлэхээр хийгдсэн байгааг эрх баригчид онцгой анхаарч, ялангуяа 50 мянган ам.доллараар зөвлөх үйлчилгээ авах ажлаас гадна хэвлэл мэдээллийг худалдан авахад 100 мянган ам.долларыг зарцуулна гэж заагдсан асуудалд хяналт тавьж, гадны лобби байгууллагын оролцоотой үйл ажиллагааг таслан зогсоох арга хэмжээ авахыг хатуу анхааруулж байна” гэжээ.

Б.АНХМАА