Өнөөдөр АН-аас Ерөнхийлөгчийн сонгуульд нэр өрсөлдөх хүсэлтэй гишүүдийг АН-ын дотоод сонгуулийн хорооноос бүртгэж, нэр дэвшигчийн үнэмлэх гардуулсан бол нөгөө талаас Ц.Туваан тэргүүтэй АН-аас Х.Тэмүүжин, Д.Ганбат, Н.Алтанхуяг, С.Ганбаатар нэр дэвших хүсэлтээ өглөө. 

С.Эрдэнэ тэргүүтэй АН-аас Р.Амаржаргал, Ц.Оюунгэрэл, Д.Ганбат, С.Эрдэнэ, Л.Гүндалай нар дэвших хүсэлтээ өгч, үнэмлэхээ гардан авлаа. Энэ үеэр АН-ын дарга С.Эрдэнэ "Өнөөдөр манай УДШ-д бүртгүүлсэн үндсэн дүрмийн заалт байгаа. АН-д гишүүнээр элсээд гурван сарын дараа сонгох эрх нь нээгддэг, зургаан сарын дараа сонгогдох эрх нь нээгддэг дүрэмтэй. Тэгэхээр С.Ганбаатар гишүүний хувьд өнөөдөр АН-д элсээд, маргааш нь ийм хариуцлагатай сонгуульд нэр дэвшиж байгаа асуудал бол магадгүй өөртөө итгэж байгаа итгэлийг нь илэрхийлэх байх. Гэхдээ дүрэм бол дүрэм. АН өөрөө дүрэмтэй нам.

Дүрэм зөрчсөн аливаа үйлдэл хууль ёсных байж чадахгүй гэдгийг хэлмээр байна. С.Ганбаатар гэдэг хүн АН-д албан ёсоор гишүүнээр элсэнэ гэдэг өргөдлөө ирүүлээгүй байгаа. АН-д элсээгүй байгаа. Зүгээр тэр АН гээд өөрсдийгөө тодорхойлоод байгаа хэсэг бүлэг хүмүүс дээр очиж элссэн юм шиг байна лээ. Тэр тогтоол шийдвэр хүчин төгөлдөр бус гэдгийг АН-ын даргын хувьд, үүрэгт ажлаа хараахан хүлээлгэж өгөөгүй байгаа хүний хувьд хариуцлагатайгаар хэлье" гэлээ.