Сингапурт бүртгэлтэй “Женко Холдинг Пи-Ти-И” компанийг Х.Баттулгын охин Намуун, Сингапурын хятад Билли Лимийн хүү Деннис Лим нар эзэмшдэг болох нь баримтаар ил болсон. Х.Баттулга өөрөө “Женко Холдинг Пи-Ти-И” гэх оффшор бүсэд бүртгэлтэй компанийн гарын үсэг зурдаг захирлаар 2007 оны долдугаар сарын 31-нийг хүртэл ажиллаж байв. Тухайн үед УИХ-ын гишүүнээр сонгогдсон байсан нь гадаадад оффшор бүсэд бүртгүүлсэн компанийн захирал байх хуулийн эрхгүй албан тушаалтан байв.

Х.Баттулга “Женко Холдинг Пи-Ти-И” компанийн хувьцаа эзэмшигч байж байгаад охиндоо шилжүүлсэн.

Х.Баттулга УИХ-ын гишүүн байхдаа буюу 2007 оны зургадугаар сарын 13-ныг хүртэл Сингапурын оффшорт үүсгэн байгуулсан “Атом Индастриз Энтерпрайз Пи-Ти-И” компанийн захирлаар ажиллаж байсан ч энэ нь хөрөнгө орлогын мэдүүлэгт тусгагдаж байгаагүй юм.

Мөн 2011 он гэхэд “Биз-Интегрэйшн Пи-Ти-И” гэх компанийн хувьцаа эзэмшигчээр Х.Баттулга байсаар л байж. “Ассет Профешионал Сервисес Пи-Ти-И” гэсэн компанийг мөн л өөрийн нэр дээр үүсгэн байгуулсан.

Мөн “Камекс” ХХК байгуулж, энэ компанийнхаа 90 хувийг өөрөө эзэмшиж, Ядамсүрэнгийн Батсүх буюу “Ард Батсүх” 10 хувийг эзэмшиж байв.     Х.Баттулга өөрийн нэр дээр байсан 90 хувийг 2007 оны гуравдугаар сарын 21-ний өдөр өөрийн охин Б.Намуунд шилжүүлж, тун удалгүй 2007 оны дөрөвдүгээр сарын 4-нд төрсөн эгч Халтмаагийн Цэндсүрэнд шилжүүлсэн байдаг.

Х.Баттулгын үүсгэн байгуулсан “Камекс” ХХК-ийн охин компани “Төгрөг нуур энержи”-д байсан Төгрөг нуурын нүүрсний ордыг болон хэд хэдэн ордыг Хятад эзэнтэй Хонконгийн хөрөнгийн биржид бүртгэлтэй “Минг Хинг Уотеруоркс Холдингс Лимитед” компанид 250 сая ам.доллараар зарсан нь олонд ил болсон.

Харин нэг нууцлаг зүйл гэвэл тун удалгүй “Камекс” ХХК-ийн дээр толгой компани болгож “Камекс Пи-Ти-И” нэртэй Сингапурт бүртгэлтэй оффшор компанийг үүсгэсэн байдаг. Тэрний дээр нь 100 хувийн хувьцаа эзэмшигчээр Вел Делайт \Well Delight BVI\, бас түүний дээр нь Бэст Стэйт \Best State BVI\, Сино аксес \Sino Access BVI\ гэсэн нэртэй Британийн Виржинийн арлын оффшор бүсэд бүртгүүлсэн гурван ч компани үүсгэсэн байдаг. Таван шат дамжсаны эцэст нь оффшор бүсэд байгаа хоёр толгой компанийн хувьцаа эзэмшигч нь Х.Баттулга ерөнхийлөгчтэй Жүдогийн холбооны Ерөнхий нарийн бичгийн дарга Машбатын Бөхбат, нөгөө л Ядамсүрэнгийн Батсүх, Билли Лим Сим Пау-гийн охин Хуй Шим Лим Селестина нар байв. Гэхдээ анх компанийг үүсгэн байгуулж 90 хувийг эзэмшиж байсан Х.Баттулгын нэр нь одоо алга болсон байдаг. 90 хувиа Х.Баттулга зүгээр л энэ хүмүүст тараагаад өгөөгүй нь ойлгомжтой.

Дараа нь Брейв лайон \Brave Lion BVI\ гэсэн нэртэй бас нэг оффшор компанид толгой хоёр оффшор компаниа зарсан байдаг. Ийм олон толгой компанийг оффшор бүсэд үүсгэн байгуулж, таван ч шат дамжин давхар, давхар эзэмшүүлэх нь ямар зорилготой байсан бэ.

Хятад эзэнтэй оффшор бүсэд бүртгэлтэй Хонгконгийн хөрөнгийн биржийн Мин Шин компанид зарагдсан оффшор бүсэд бүртгэлтэй “Камекс Пи-Ти-И” компани нь “Женко Холдинг Пи-Ти-И” компаниас байр түрээсэлж,  нэг дор үйл ажиллагаагаа явуулж байсан нь хөрөнгийн биржийн материалд ил тавигдсан байв. 

Олон нийтэд баримтаар хэдийнээ ил болсон оффшорын “эзэн” Х.Баттулгын мэдээллийг тоймлон хүргэхэд ийм байна.

Б.НАРАН