“С.Зоригийн хэргийн захиалагчийг хэзээ зарлах вэ” гэсэн сэтгүүлчийн асуултад Ц.Нямдорж хариулахдаа "Би захиалагч гэдэг үгийг хэрэглэхдээ заавал гэх үгийг хэлж явдаг. Учир нь, тэр үедээ хэргийг шалгасан хүмүүс захиалагчийг зарлаагүй, олоогүй байж захиалагчаар хүн алсан гэж Т.Чимгээ, Б.Содномдаржаа нарыг ялласан. Энэ хэрэгт Э.Бат-Үүлийг захиалагчаар татсан. Ц.Амгаланбаатарын мэдүүлгээр шүү дээ. Хамжигчаар нь Б.Булганыг татсан, 10 сар хорьсон. Тогтоож чадаагүй сулласан. Э.Бат-Үүлийг 2016 онд яллагдагчаар татсан, 20 хоногийн дараа тогтоолоо хүчингүй болгосон. Тэр Ц.Амгаланбаатар гэдэг хүн 2014 оноос хойш Э.Бат-Үүлийг яриад байсан. Ядаж л Э.Бат-Үүлийг байцаах ёстой, байцаагаагүй" гэж ярьжээ.

Анх 2017 оны гуравдугаар сард Ц.Нямдорж мэдээлэл хийж, Т.Чимгээ, Б.Содномдаржаа нарт бичсэн Ц.Амгаланбаатарын мессэжийг дэлгэсэн. Гэхдээ Ц.Амгаланбаатар руу Т.Чимгээ, Б.Содномдаржаа нар хариу юу гэж бичсэн, хэргийн холбогдогч нар хэзээ, ямар байдлаар уулзсан, хоорондоо юу ярьсныг нь Ц.Нямдорж дэлгэдэггүй.

Б.Хурцын эхнэр Ү.Сарнай өнгөрсөн дөрөвдүгээр сарын 20-нд ҮАБЗ-ийн гурав болон Ц.Нямдорж, Х.Нямбаатар, Тагнуулын ерөнхий газрын дарга П.Одонбаатар, Улсын ерөнхий прокурор Б.Жаргалсайхан нарт шаардлага хүргүүлэхдээ “Засгийн газраас ил болгох гэж байгаа хэргийн материалууд дотроос ялтнуудын хоорондоо утсаар ярилцсан, уулзалдсан бичлэгүүд алга болчих вий. Зарим баримтыг санаатайгаар сугалж аваад дарчихгүй байгаа” гэх хардлага учир мэдэх хүмүүсийн дунд байгааг онцолсон.

Хэрэвзээ Т.Чимгээ, Б.Содномдаржаа нар гэм буруугүй юм бол тэдний хоорондоо юу ярьсныг нь Ц.Нямдорж дэлгэх хэрэгтэй.

Өнгөрсөн 23 жилийн хугацаанд С.Зоригийн амь намыг хэн хөнөөв, захиалагч нь хэн бэ гэдэг нь одоо болтол тодроогүй байна.

Б.САНАА