Ерөнхийлөгчийн сонгуульд "Зөв хүн-Электорат" эвслээс нэр дэвшиж буй Д.Энхбат 2008 оны долдугаар сарын 1-ний өдөр намын даргын хувиар тухайн жагсаалд ямар оролцоотой байснаа тайлбарлан өдөр тутмын хэвлэлд өгсөн ярилцлагадаа дурджээ. Тэрбээр,

"Миний үүрэг нэгэнт сонгуульд орсон улс төрийн хүчнийг толгойлж байсан учир нөгөө хоёртойгоо хамт очиж үгээ хэлэх, үймээн гаргахгүй байх өөрсдийн алхмаа хийх ёстой гэж итгэсэн. Хариуцлага хүлээж буй улсууд хэцүү цагт хэрэгтэй цэгт очих ёстой гэж би боддог. Тэгээд очсон. Дахиад ийм хэцүү цаг ирвэл би дахиад л үүргээ биелүүлэх болно. Би очоод хоёр зүйлийг хэлсэн. Нэгдүгээрт, жагсаалыг аль нэг намын байрны үүдэнд хийж болохгүй. Хоёрдугаарт, ерөөсөө энэ сонгуулийг будлиантай гэсэн хар байгаа бол хамтран шалгах, тэгээд будилаантсан бол ганцхан суудал авсан Иргэний эвсэл ч өөрийнхөө суудлаас татгалзах ёстой гэж мэдэгдсэн. Ийм үйл явдал өрнөж байхад хариуцлага хүлээсэн улс төрийн хүчний удирдагчид очиж, шийдэх зөв замыг хайхаа амлаж, бухимдлыг тайлах ёстой бус уу” гэжээ. 

Дашрамд дурдахад 2008 оны долдугаар сарын 1-ний үймээн, жагсаалыг Д.Энхбат, Ж.Батзандан, О.Магнай нарыг эхлүүлсэн гэдэг боловч 5 хүний амь эрсдэж, олон залуучууд шоронд ороход тэднийг хариуцлага хүлээгээгүй үлдэж хоцорсон гэдэг.

Д.Энхбатыг “Буян” С.Жаргалсайхан саяхан сошиал хуудастаа “Д.Энхбат 2008 оны долдугаар сарын 1-ний өдрийн үймээнийг зохион байгуулж, эхлүүлсэн. Яг цагаа тулсан чинь Д.Энхбат зугтаад нуугдчихсан” гэж хэлжээ.

 Х.АМАР