Ерөнхийлөгчийн сонгуульд нэр дэвшигчид сурталчилгааны ажлаа эхлүүлээд байна. Сонгуулийн сурталчилгааны гол зүйлийн нэг нь нэр дэвшигчдийн уриа үг байдаг билээ. Учир нь тухайн нэр дэвшигч ялалт байгуулвал уриа үг нь түүний бүрэн эрхээ хэрэгжүүлэх хугацаан дахь улстөрийн үйл ажиллагаа болж хувирдаг. Иймээс гурван нэр дэвшигчийн уриа үг аль хэдийнэ сошиал ертөнцөд ярианы сэдэв болжээ. Тэр тусмаа ХҮН-аас нэр дэвшигч Д.Энхбатын “Монгол чадна” гэх уриа нь шүүмжлэл дагуулж эхэлжээ.

2017 оны Ерөнхийлөгчийн сонгуулиар одоогийн Ерөнхийлөгч Х.Баттулга “Монгол Ялна” уриатайгаар ялалт байгуулж байлаа. Товчхондоо Д.Энхбатын Монгол чадна, Х.Баттулгын Монгол ялна гэдэгтэй агаар нэг мэт сонсогдож байна. Нэр дэвшигч Д.Энхбатын уриа үг, сурталчилгааны нээлт дээрээ “ташуур” барьсан байх нь яахын аргагүй Ерөнхийлөгч Х.Баттулгыг санагдуулна. Тэр ч гэсэн ташуур барьж, Монгол ялна гэж ярьж байсныг бид санаж байна.

Ямартай Д.Энхбат нэр дэвшигчийн үг, үйлдэл хоёр нь одоогийн Ерөнхийлөгчи Х.Баттулгыг дуурайсан уу эсвэл үргэлжлүүлж байна уу гэдэг асуудлтыг дагуулаад байна. Сурталчилгааны үед нэр дэвшигч үе шаттайгаар уриа, мессежээ сольдог. Магадгүй Д.Энхбат нэр дэвшигч цаашдаа уг уриагаа өөрчилж, дараагийн шатны шинэ уриаг гаргаад ирэхийг ч үгүйсгэхгүй.