Ерөнхийлөгчийн сонгуульд нэр дэвшигчдийн мэтгэлцээнийг өнөөдөр 17.30 цагт Монголын үндэсний олон нийтийн радио телевизээр шууд дамжуулахаар тов гараад байсан.

Гэтэл ‘Зөв хүн электорат’ эвслээс нэр дэвшигч Д.Энхбат Ковид-19-ын халдвар авч Улсын хоёрдугаар төв эмнэлэгт хэвтэн эмчлүүлж байгаа билээ. Тиймээс мэтгэлцээн болох эсэх, болбол хэрхэн яаж зохион байгуулах нь тодорхой бус болоод байгаа юм. МҮОНРТ-ийн гүйцэтгэх захирал А.Бүрэнбаатар болон холбогдох албан тушаалтнууд өчигдөр гурван нэр дэвшигчийн сонгуулийн ерөнхий менежерүүдтэй уулзаж мэтгэлцээнийг хэрхэн хийх талаар ярилцсан ч тодорхой шийдвэр гаргаж чадаагүй байна. Тиймээс өнөөдөр дахин уулзаж мэтгэлцээнийг хэрхэн хийх талаар ярилцаж, эцсийн шийдвэрийг гаргах юм байна. 

МҮОНРТ-ийн гүйцэтгэх захирал А.Бүрэнбаатар “Мэтгэлцээнийг аль болох хийх талаар гарц, гаргалгааг ярилцаж байна. Онлайнаар явуулахаар тэгш байдал хангагдахгүй гэж үзэж байгаа. Энэ тохиолдолд мэтгэлцээнийг хэрхэн явуулах талаар байж болох бүх хувилбарыг бид ярилцаж байна. Өнөөдөр намын төлөөллүүдтэй дахин уулзаж, эцсийн шийдвэрийг гаргана. 13.00 цаг гэхэд эцсийн шийдвэр гарчих байх” гэлээ.