Улс төрийн тоймч Э.Дөлгөөн Ерөнхийлөгч Х.Баттулгад хандаж Монгол төрийн сонгуулиас савраа тат хэмээн хатуухан үгийг хэлжээ. Тодруулбал, түүнээс хэрэв Ерөнхийлөгч Х.Баттулгатай таарвал юу гэж хэлэх вэ?хэмээн асуухад дараах хариултыг өгсөн байна. 

Тэрээр "Ерөнхийлөгч Халтмаагийн Баттулга та Монгол төрийн сонгуульд хошуу бүү дүрээч. Монголчууд ардчилсан чөлөөт сонголтоор төрийнхөө удирдлагыг сонгодог болоод 30 гаруй жил болжээ. Энэ үйл явцад хувийн өш хонзон, эрх мэдлийн шуналаа бүү тусгаач. 2017 онд Монголын сонгогчид таны эрх мэдлийн шуналыг хангаж өгсөн. Та өнгөрөгч хугацаанд Монгол түмний эв нэгдлийг илэрхийлэгч бус, бутарган сарниулагч л байж чадлаа. Танаас болж Монгол үндэстний гал бөхөж, голомтных нь утаа саргиж байна. Таньд бүх боломж байсан. Харин одоо монголчууд эв эеэ зангидаж барьж авахад бүү дэгээ тавиач. Миний хүүхэд Монголын мянга мянган үрс хуультай, ёс зүйтэй төр улсад амьдармаар байна. Төрийнхөө тэргүүнийг сонгож болохгүй ээ гэж уриалж байгаа хүмүүс лав та бидний ирээдүйн төлөө биш ээ. Төрийн минь сүлд ивээх болтугай" гэжээ.