УИХ-ын гишүүн Б.Пүрэвдорж, АН-ын гишүүн Х.Тэмүүжин, З.Нарантуяа нар мэдээлэл хийлээ. Тэд АН-ын дотоод эв нэгдлийг хангах намын Их хурлыг хуралдуулж, нэг удирдлагатай болгох зорилгоор 100 мянган гишүүний гарын үсэг цуглуулах санаачлагыг өнөөдрөөс эхлүүлж байгаагаа мэдэгдлээ. 

УИХ-ын гишүүн Б.Пүрэвдорж: Энэ удаагийн сонгуульд АН хамгийн бага санал авсан. Өнгөрсөн оны 10 дугаар сараас эхлэн МАН АН-ын дотоод хагарлыг мөн сонгуулийн хуулийг тодорхой хэмжээгээр өөрт ашигтайгаар ашиглаж ирлээ. АН-ын онц их хурлыг зарлах, нэг удирдлагатай болгох санаачлагыг жирийн гишүүдийн зүгээс маш ихээр ирүүлж байна. Улсын дээд шүүхэд хэд хэдэн удаа материалаа хүргүүлсэн боловч дотоод эв нэгдлээ хангаад ир гэсэн ганцхан шаардлага тавьж буй. АН-ыг нэг удирдлагатай болгох аянд жирийн гишүүдийг идэвхтэй оролцохыг уриалж байна гэлээ. 

АН-ын гишүүн З.Нарантуяа: Монголын парламентад сөрөг хүчнээс тавих хяналтыг чангатгах сөрөг хүчний чадамжийн тухай асуудал. АН эв нэгдэлгүй байгаагийн улмаас сүүлийн УИХ-ын хоёр сонгууль, Ерөнхийлөгчийн сонгуульд маш амжилтгүй оролцлоо. Цаашид хариуцлагаа хүлээж огцорч чаддаг намын удирдлагатай байх улс төрийн соёл суулгахад чухал ач холбогдолтой. Иймээс АН зайлшгүй сэргэн босох шаардлагатай. Хоорондоо таарч зохицохоо больсон лидерүүдийн улмаас АН тарж бутарна гэсэн ойлголт байхгүй" гэв. 

АН-ын гишүүн Х.Тэмүүжин: Энэ намд хүмүүс итгэдэг байсан. Гэтэл тэр итгэлийг өөр хоорондоо талцсан байдал эвдэж байна. Иймээс АН-ын гишүүд бид эв нэгдлийг сэргээх зорилгоор мянга мянган гишүүдийн гарын үсгийг цуглуулж байна. Тамганы булан барьж булаацалдаж байгаа хүмүүс гишүүдээ хонь адил хашаанд хашиж байгаа бол энэ нам эзэнгүй болно гэсэн үг. Тийм учраас өөр хооронд босгосон хашаа хороогоо нурааж, гишүүдээ хонь гэж харахаас илүүтэй энэ орны тусгаар тогтнолд хүч өгдөг итгэл үнэмшилтэй иргэд гэж харж нэгдэх цаг болсон байна. Иймээс АН-ын гишүүд бид эв нэгдлийг сэргээх зорилгоор мянга мянган гишүүдийн гарын үсгийг цуглуулж байна. гэж ярилаа.