Энэ удаагийн хуралдаанаар Коронавируст халдвар (КОВИД-19)-ын цар тахлын өнөөгийн байдал, халдварыг бууруулах чиглэлээр хэрэгжүүлэх арга хэмжээ, мөн сүүлийн үед идэвхжил нь эрчимжиж буй газар хөдлөлтийн гамшгийн эрсдэл болон цаг агаарын гамшигт үзэгдлийг хохирол багатай даван туулах Эрсдэлийн сан бүрдүүлж, цаашид баримтлах бодлогын асуудлаар хэлэлцэж байна.

Энэ үеэр Эрүүл мэндийн сайд С.Энхболд: "Улсын хэмжээнд нийт 27 мянган ор байдаг. Үүнээс 14,500 орыг коронавируст халдварын үед зориулан дэлгэсэн. Эмнэлгүүдэд нийт 1087 амьсгалын аппарат бий. Нөөцөд 100 гаруй аппарат байгаа. ЭКМО аппарат улсын хэмжээнд гурав байна. Нэг ЭКМО аппаратыг захиалсан ба хүлээлгэд байгаа.
Манай улсад хоёр удаагийн давлагаа үүссэн. Өдөрт нийслэлийн хэмжээнд 500-600 тохиолдол бүртгэж байна. Хөдөө орон нутагт халдварын тохиолдол нэмэгдэж байна. Тархалтын түвшин тогтвортой байгаа. Бид улсын хэмжээнд долоо хоногт дунджаар 30-40 мянган ПСР шинжилгээ хийдэг. 

Одоо анхаарах гол асуудал нь Дельта вирусийн мутацлагдсан хувилбар байна. Өнөөдрийн байдлаар Дельта вирус 124 улсад тархсан бөгөөд халдварлах чадвар нь Альфа хувилбараас 60%-аар их гэдэг нь судалгаагаар тогтоогдсон.Өөрөөр хэлбэл коронавирусийн бусад хувилбараар өвчлөөд эдгэсэн хүн Дельта хувилбараар өвчлөх эрсдэл өндөр байгаа. Манай улсад одоогийн байдлаар Дельта хувилбарын долоон тохиолдол батлагдсан бөгөөд холбогдох судалгаа хийгдэж байгаа. 

Цаашид дотооддоо халдварын тохиолдолд анхаарал татсан хувилбаруудыг хянах, гурав дахь тунг наймдугаар сарын сүүлээр эхлүүлэхээр төлөвлөн ажиллаж байна" гэлээ.