Улаанбаатар хотын дарга Д.Сумъяабазарыг Үндэсний хөрөнгө оруулалтай банктай нь холбогдуулж АТГ-аас шалгаж эхэлсэн мэдээллийн ард МАН-ын дотоод зодоон явж байна. Чингис хаан, Үндэсний хөрөнгө оруулалтын банкинд “Эрдэнэт” үйлдвэрийн 45 тэрбум, “Эрдэнэс Тавантолгой ХК-ийн  28 тэрбум, ЭМДЕГ-ын 25 тэрбум, Таван толгой ХК-ийн 10 тэрбум, НДЕГ-ын 5 тэрбум , Хөгжлийн банкны нэг тэрбум, Сангийн яамны хоёр тэрбум, ЖДҮХС-гийн 1.4 тэрбум  зэрэг нийт 120 тэрбум байршиж байсан тухай мэдээллийг эрх барьж буй нам болох МАН дотроосоо зориуд гаргаж байна. Банк дампуурах болсон шалтгаан нь чанаргүй зээлтэй холбоотой. Тухайлбал, Д.Сумъяабазар 8 тэрбум, Д.Дагвадорж 12 тэрбум, Б.Баярсайхан 14 тэрбум төгрөгийн чанаргүй зээлтэй гэх мэдээлэл нь анхаарал татаж байна. Өнгөрсөн жил гаруй хугацаанд УИХ-ын хэд хэдэн гишүүн болон УИХ, Орон нутгийн ИТХ-д нэр дэвшигчдэд их хэмжээний зээл олгосон нь тогтоогдсон гэж эх сурвалж мэдээллээ гэх мэдээллүүд хөвөрч байна. Үүнээс үзэхэд Д.Сумъяабазарын банкнаас УИХ-ын гишүүдээс хэн хэн чанаргүй зээл авав гээд цааш нь хөвөрч ч мэдэхээр байна.

Хотын дарга Д.Сумъабазар Сонгинохайрхан дүүргийг зангидсан гар шиг атгаж байсан бол МАН дотроо түүний эрх мэдлийг багасгах зорилгоор МАХН-ын Н.Энхбаярын хүү Э.Батшугарыг “шидэж” өгсөн. СХД-ийн МАН-ын залуучууд МАХН-ын мэдэлд очиж мэдэх СХД-ээ хамгаалахын тулд Э.Батшугарыг илэрхий дэмжихгүй байгаа.

СХД-ийн нөхөн сонгуульд Э.Батшугар ялагдал хүлээж байж дүүргээ авч үлдэнэ гэж буй. Тэгтэл Ерөнхий сайд Л.Оюун-Эрдэнийн Засгийн газар түүнд харьяалагдах сайд нарын асуудал эрчимтэй яригдаж эхэлсэн.  Шилэн Цогоо ойрын үед засаг руу байн байн довтлох болж. Тухайлбал, 2022 оны төсвийг  “Сангийн яамны найркачид найрчээ” гэх мэтээр Сангийн яам руу довтолж байна.

Сая чуулган нээгдэхэд УИХ-ын дарга Г.Занданшатар “Сайд нараас хариуцлага нэхэж шаардлага тавина гэдгээ шууд ил хэлсэн нь Л.Оюун-Эрдэнийн Засгийн газар ганхсаны дохио.

Ийнхүү МАН-ын гишүүдийн хоёр хуваагдал дээд цэгтээ хүрч, хоёрдугаар ээлжийнхэн хоолондоо орохоор яарч байна.

МАН-ын дотоод зодоонд Л.Оюун-Эрдэнэ, Д.Сумъяабазар нар нэг тал болж нам дотроо хүч хавсарч буй.

Юутай ч СХД-ийг Д.Сумъяабазар авч үлдэж чадах үү. МАХН-ын Э.Батшугар, Намбарын Энхбаяр нар авах уу гэдэг нь цаг хугацааны асуудал.