Засгийн газрын өнөөдрийн ээлжит хуралдаанаар коронавирусний цар тахлын нөхцөл байдал олон улсад болон Монгол Улсад ямар байгаа талаар Эрүүл мэндийн сайд С.Энхболд танилцуулжээ. Энэ үеэр коронавируст халдвараас урьдчилан сэргийлэх вакцины гуравдугаар тунгийн хамрагдалт зорилтот бүлгийн иргэдийн 50 хувьд хүрвэл ЕБС-ийн танхимын хичээлийг эхлүүлэх бөгөөд дөрөвдүгээр тунг тарих асуудлыг судалж байгаа гэж мэдээллээ. 

Эрүүл мэндийн сайд С.Энхболд... Манай улсын хувьд, эрдэмтдийн тооцоогоор, коронавирусний дельта хувилбарын давалгаа 9-10 дугаар сард болохоор байсан тул намраас гуравдугаар тунд иргэдээ хамруулж эхэлсэн. Өнөөдрийн байдлаар, 589 мянга буюу зорилтот бүлгийн иргэдийн 28 хувийг хамруулаад байгаа юм. Хэрэв зорилтот бүлгийн иргэдийн 50 хувийг гуравдугаар тунд хамруулсан бол Өндөржүүлсэн бэлэн байдлын зэргийг нэгээр бууруулж "Шар" түвшинд шилжүүлэх боломжтой болно. Ингэснээр одоо хязгаарлалттай байгаа зарим аж ахуйн нэгжүүд нээгдэх боломж бүрдэнэ. Түүнээс гадна цэцэрлэгийн бага анги, ЕБС танхимаар бүрэн хичээллэх боломж бүрдэнэ.

Ташрамд дурдахад, коронавирусний нөхцөл байдал баруун, зүүн европын вакцины хоёрдугаар тунгийн хамрагдалт 30 хувиас бага байгаа улс орнуудад эмнэлгийн ачаалал огцом нэмэгдэж байгааг мэдээлэв. БНХАУ-д дельта хувилбарын давалгаанаас сэргийлж вакцины гуравдугаар тунг эхлүүлээд байна. Ингэхдээ, гуравдугаар тунг Модерна, Файзер вакцины технологиор өөрийн үйлдвэрлэсэн вакцинаар дархлаажуулалтаа үргэлжлүүлэхээр шийдвэрлэжээ.