УИХ-ын чуулганы өнгөрсөн долоо хонгийн хуралдаанаар ШЕЗ-ийн шүүгч бус гишүүдийг томилох асуудлыг хэлэлцсэн. Энэ үеэр УИХ дахь АН-ын бүлгээс тав хоногийн завсарлага авсан. Одоогоор УИХ дахь АН-ын бүлэг шийдвэрээ гаргаагүй байгаа ч завсарлага дуусахын өмнө байр сууриа илэрхийлнэ хэмээн УИХ-ын гишүүн Н.Ганибал мэдээллээ.

Дээрх асуудалтай холбогдуулан бид УИХ дахь АН-ын бүлгийн гишүүн Н.Ганибалаас тодруулга авлаа.

-ШЕЗ-ийн шүүгч бус таван гишүүний сонгон шалгаруулалтад  ашиг сонирхлын зөрчилтэй хүнийг нэр дэвшүүлсэн асуудал яригдаж байна. Та  энэ асуудал дээр байр суриа илэрхийлнэ үү?

“Шүүхийн шинэчлэл, шүүхийн багц хууль бол нийгмийн захиалга байсан. ШЕЗ, ШСХ-ны гишүүдийг томилгооны асуудлаар  сонсгол хийх нь маш зөв байсан ч үүнд үйл ажиллагааны процетурын алдаа гарсан. ШЕЗ-н шүүгч биш гишүүн дээр орж ирсэн Р.Онончимэг гэдэг хүн одоогоор хууль, шүүхийн асуудлтай байгаа юм билээ. Энэ нь  шүүгч нарын хурал болон сонгон шалгаруулалтын явцад яригдсан.

Ийм хүнийг ШЕЗ-н шүүгч биш гишүүнд нэр дэвшүүлж байгаа нь хууль шудрага явахгүй байнаа гэдгийн илрэл болоод байна. Тийм учраас АН-ын бүлэг завсарлага авсан.

-Та Р.Онончимэг гэдэг хүнийг нэр цохож ярьлаа. Энэ хүний хууль шүүхийн асуудалтай холбоотой баталгаатай нотлох байгаа хэрэг үү?

-Энэ асуудал дээр манай бүлэг дээр тодорхой байр сууриа илэрхийлсэн. ШЕЗ-н нэр дэвшигч нартай уулзсан. Мөн бүлэгт ирсэн баримтуудыг нь олон нийтэд гаргасан байгаа. Энэ талаарх материалыг та бүхэн манай бүлгийнхэн дээр очоод тодруулаад харах боломжтой. Харин яг надад буюу УИХ-н гишүүн дээр бол баримт ирээгүй байна. Нотириатчдын холбооны тэргүүнээр ажиллаж байхад нь маргаантай асуудлууд гарсан юм байна лээ. Тухайн асуудалтай холбоотой гомдлууд явдаг бөгөөд одоог хүртэл эцэслэн шийдэгдээгүй байгаа гэсэн ийм л мэдээлэлтэй байгаа.

-УИХ дахь АН-ын бүлэг завсарлага аваад яг ямар шийдэлд хүрэв?

Одоогоор ямар нэг шийдвэр гаргаагүй байна. Бид хуралдаж алдаа, оноог хэлэлцээд чуулганы хуралдаан дээр санал дүгнэлтэй тодорхой хэлэх болно. Түүнээс өмнө би бүлгийн өмнөөс ямар нэг тайлбар өгөх боломжгүй байна гэлээ.