Өнөөдөр Монгол Улсын Засгийн газрын бүрэлдэхүүнд багтсан шинэхэн сайдууд тангараг өргөлөө. Монгол Улсын түүхэнд байгаагүй хамгийн олон гишүүнтэй Засгийн газрын гишүүдийн дунд олны анхаарлыг татсан хэд, хэдэн сайд байсны нэг нь ЗГХЭГ-ын дарга Д.Амарбаясгалан юм.

 Монгол Улсын сайд, Засгийн газрын Хэрэг эрхлэх газрын даргаар томилогдсон Д.Амарбаясгалан хэвлэлд өгсөн ярилцлагадаа  “Миний хувьд хувь хүний зүгээс сайд болох зорилго, сонирхлыг төдийлөн илэрхийлдэггүй. МАН хоёр сонгууль дараалан засгийн эрх барьсан энэ цаг, 2024 оны УИХ-ын сонгуулийн бэлтгэл ажлыг хангах, өмнөх хоёр сонгуулиар амласан амлалтаа биелүүлэх чиглэлд онцгойлон анхаарч ажиллах шаардлага үүссэн учир сайд болох шийдвэр гаргасан.
Мөн төрийн анхан, дунд шатанд ажлын гүйцэтгэлд онцгой анхаарч ажиллах зорилгоо тавьсан. Төр иргэн богино хугацаанд ойртох ёстой. Төрийн бүтээмжийг сайжруулах тал дээр нээлттэй, ил тод байдлыг эрхэмлэн ажлын ур чадварт үндэслэсэн сайжруулалт хийнэ. Нөгөө талаар төр, иргэн, ААН-ийнхээ үйл ажиллагаанд дарамт болсон тогтолцоо он удаан жил явж ирсэн. Төр иргэн, ААН-үүддээ аль болох саад болдоггүй, амар тайван амьдрах орчин нөхцөлийг бүрдүүлэхийн төлөө бид ажиллана” гэсэн юм.