Английн парламентын гишүүн, тус улсаас Монгол Улсыг хариуцсан худалдааны элч төлөөлөгч Даниел Кавчинскитэй холбоотой авлигалын шинжтэй ноцтой мэдээлэл Английн өдөр тутмын хэвлэл “Таймс” сонинд нийтлэгджээ.

“Таймс”-ын нийтлэлд дурдсанаар парламентын гишүүн Даниел Кавчински нь албан тушаалаа ашиглан гадны улс орны уул уурхайн компаниудаас 250 гаруй  мянган  фунт стерлинг  буюу тэрбум гаруй төгрөгтэй тэнцэх мөнгө авсан гэх хэргээр шалгагджээ. Түүнийг гадны уул уурхайн компаниас өндөр цалин авч тэдний ашиг сонирхлыг ядуу буурай орнуудад лобби хийх замаар гүйцэлдүүлдэг байж болзошгүй гэх үндэслэлээр байцаасан байна. Ноцтой нь “Таймс” сонины мэдээлэл дотор Монгол Улсын нэр дурдагдсан байх бөгөөд Даниел Кавчински нь Монголын уул уурхайн салбарын төлөөлөгчидтэй  уулзалт хийсэн. Борис Жонсоны худалдааны элчээр ажиллаж байхдаа олон улсын уул уурхайн компанид зөвлөгөө өгөхийн тулд 250 мянга гаруй фунт стерлингийн цалин авсан гэжээ. “Таймс”-ын нийтлэлээс үзэхэд гадны улс орон гэдэг нь Монгол Улс байх магадлал тун өндөр байна.

Даниел Кавчински нь саяхан шившигтэйгээр хөөгдөж буусан Английн Ерөнхий сайд асан Борис Жонсонтой тун ойр холбоотой ажилладаг нэгэн. Энэ тухай ч бас сонины нийтлэлд дурдсан нь санамсаргүй зүйл биш бололтой юм. Английн түүхэнд байгаагүйгээр шившигтэй байдлаар өөрийн кабинетын бүх  сайд нарынхаа эсэргүүцлээр хөөгдөж буусан Жонсоны талаар болон түүний ойр холбоотон болох Даниел Кавчинскигийн талаар “но”-той мэдээллүүд гадны хэвлэлүүдээр гарсаар байгаа аж.

Борис Жонсоны тавиул гэх Английн парламентын гишүүн, Монгол Улсыг хариуцсан худалдааны элч төлөөлөгч Даниел Кавчински нь яг энэ мөчид Монголд албан ажлаар ирсэн байх бөгөөд Улаанбаатар хотын даргатай албан уулзалт хийх зэргээр Монголд ажиллаж байна.

Гадны уул уурхайн компаниас өндөр цалин авч тэдний ашиг сонирхлыг ядуу буурай орнуудад лобби хийх замаар гүйцэлдүүлдэг гэх ноцтой хэрэгт холбогдсон Даниел Кавчински нь энэ удаа Монголд ирэхдээ давхар ямар зорилготой, ажилтай яваа вэ? “Таймс” сонины мэдээллээр бол Монголын уул уурхайн компанийн хэрэгт оролцож, лобби хийх, хууль бус эрх ашигт үйлчилсэн байж болзошгүй гэж байгааг Монголын хууль хяналтын байгууллага анхааралдаа авч шалгах биз ээ.

Даниел Кавчинскитэй холбоотой “Тhe Times” сонины мэдээллийг эндээс уншина уу. 

https://www.thetimes.co.uk/article/daniel-kawczynski-mp-who-intimidated-staff-faces-new-sanctions-3z9pxrbvf /