Эдийн засгийн байнгын хорооны хуралдаанаар Үндсэн хуулийн цэцийн 2019 оны 03 дугаар дүгнэлтийг хэлэлцэв. Уг дүгнэлтэд Ашигт малтмалтын тухай хуулийн заалт Үндсэн хууль зөрчиж байна. Ашигт малтмалын тухай хуулийн заалтаар татвар давхардуулан авахаар байна гэсэн юм. Хэлэлцэж байгаа асуудалтай холбогдуулан гишүүд асуулт тавьж, хариулт авав.

УИХ-ын гишүүн Ц.Гарамжав:
-Татвар хаанаа давхцаад байна вэ? Үүнийг жишээтэй тайлбарлахгүй юу. Олон төрлийн ашигт малтмал гаргадаг үйлдвэрүүдийн татвар ямар байна вэ?
Ажлын хэсэг:
-2019 оны гуравдугаар сарын 26-нд оруулсан нэмэлт өөрчлөлтөөр давхардсан татвар орсон байна лээ. Барилгын материал, ашигт малтмал гээд бүхий л төрлийн үйл ажиллагаа явуулж байгаа бол тэр болгондоо татвар төлөхөөр байгаа.

УИХ-ын гишүүн Б.Баттөмөр:
-Үндсэн хуулийн Цэцийн тайлбар хангалтгүй байна. НӨАТ-ыг давхар төлж байгаа юу.

-УУХҮЯ-ны Геологи, уул уурхайн бодлогын хэрэгжилтийг зохицуулах газрын дарга Б.Мөнхтөр:
-Ашигт малтмалын нөөц ашигласны төлбөрийн хувьд татвар давхцуулсан тохиолдол байхгүй. Ашигт малтмалын нэмэлт өөрчлөлтөөр хүдэр, баяжмал бүтээгдэхүүнд давхардуулахгүйгээр олгоно гэж заасан байгаа.

УИХ-ын гишүүн Х.Болорчулуун:
-Үндсэн хуулийн Цэцийн дүгнэлтийг хүлээж авах боломжгүй. Үндсэн хуулийн Цэцийн гишүүд эдийн засгийн мэдлэг муутай юм уу эсвэл төлөөлж очсон хүмүүс тайлбараа дутуу хийв үү. ҮХЦ-ийн дүгнэлтийг хүлээж авбал татвараас бултах эрсдэлтэй. Энэ байдлыг таслан зогсоох зорилгоор Ашигт малтмалын тухай хуулийг гаргасан.
Ийнхүү гишүүд асуулт тавьж, хариулт авсны дараа санал хураалт явуулав. Байнгын хорооны хуралдаанд оролцсон гишүүдийн олонхын саналаар Үндсэн хуулийн Цэцийн дүгнэлтийг хүлээж авах боломжгүй гэж үзлээ.