Ерөнхий сайд Л.Оюун-Эрдэнэ хоёрдугаар сарын 19-нд МҮОНРТ-ийн Монголын мэдээ сувгийн “Онцлох зочин” нэвтрүүлэгт оролцох үеэрээ Нүүрсний хулгайн хэрэгт холбоотой УИХ-ын гишүүний бүрэн эрхээсээ түдгэлзэн, хуулийн байгууллагаар шалгуулах гишүүдийн тоо хоёроор тогтохгүй гэж ярилаа.

Ерөнхий сайд Л.Оюун-Эрдэнэ “Одоогоор хоёр УИХ-ын гишүүн /Ж.Мөнхбат, Т.Аюурсайхан/ бүрэн эрхээсээ түдгэлзэх хүсэлт гаргасан. Хаврын чуулганыг нээсний дараа энэ хоёр гишүүний бүрэн эрхийг түдгэлзүүлэх асуудлыг шууд хэлэлцэнэ. Цаашид хоёроор тогтохгүй байх. Олон гишүүдийг би буруугүй л юм бол шалгуул, бүрэн эрхээр битгий халхавчил гэж хэлж байгаа. Халдашгүй бүрэн эрх бол гэмт хэргээс нуугдах биш ард түмний төлөөллийг хамгаалж буй зүйл. Парламентын гишүүн ёс зүйн өндөрлөг байх ёстой.

Улстөрчдийн ах дүү, хамаатан саднууд төрийн албанд томилогдох, тендерт оролцох боломжийг хязгаарлах хуулийн төслийг өргөн барихаар бэлтгэж байна. УИХ-ын гишүүн бол иргэн биш, иргэний төлөөлөл. Иргэдээс давуу нь халдашгүй байдал, мэдээлэлд нэвтрэх эрх мөн. Парламентын гишүүд өөрсдөө хулгай хийж, зээл авч, хэрэгт орж байгаа нь тэдний баталсан хуулийг хэн дагах юм бэ гэдэг асуудал руу аваачна. Яагаад 1.5 сая төгрөгийн цалинтай төрийн албан хаагч хувийн хэвшлийнхнээс илүү тансаг зэрэглэлийн 6-8 давхар хауст амьдрах ёстой гэж. Энэ бүхэн авлига шүү дээ. Баримт нотолгоотой мэдээллийг шүгэлдэж нийгмийн анхааралд оруулсан хүн ямар хариуцлага хүлээдэггүй болгож хуульчилна” гэв.

Өөрөөр хэлбэл авлига авдаг хууль хяналт, прокурорын байгууллагынхан, орлогоо нотолж чадахгүй байгаа төрийн албан хаагчдыг шүүрдэж, цэвэрлэнэ гэсэн үг.