Ардчилсан Намын бүлгийн хуралдааны шийдвэрийг танилцуулах үеэр хойшлуулаад байсан нүүрсний сонсголыг яаралтай явуулаач гэх шаардлагыг УИХ-д хүргүүлэх гэж байгаа тухай мэдээлсэн. Энэ үеэр УИХ-ын гишүүн Н.Ганибал "Ерөнхий сайд Л.Оюун-Эрдэнэ авлигатай тэмцэж, түүнээсээ орлого олж байгаа юм шиг ярьж байна. Тэр мөнгөөрөө цалин тэтгэвэр нэмнэ гэнэ. Энэ бол худлаа. Олон улсын зах зээл дээр коксжсон нүүрсний үнэ унасан. Бид 180 ам.доллараар хил дээр зарах чадамжгүй боллоо. Засгийн газар цалин тэтгэврийг нэмэхдээ хөнжлийнхөө хэрээр хөлөө жийж нэмэх ёстой байсан. Ирээдүйд олохгүй орлогоор цалин, тэтгэврийг нэмэх гээд байна. Гурван жил дараалан инфляц 10-аас дээш хувьтай байх энэ цаг хугацаанд яагаад төсөв ярихдаа цалин, тэтгэврийн зөв хуваарилалтыг хийгээгүй юм бэ. Биднийг хэлэхээр тоохгүй. Сонгууль дөхөөд ирэхээр бид цалин, тэтгэвэр нэмж байна гэх юм. Ард түмний халааснаас хулгайлсан мөнгөө буцааж өгөх гэж байна. Өнөөдөр 14 их наяд төгрөг иргэдийн халааснаас алдагдсан. Өнөөдөр үүнээс 1.8 их наяд төгрөгийг л нөхөж өгөх гэж байна.

Мөн нүүрсний хэргийн 100 орчим хүнийг гэрчээр дуудах нэрсийг зарлах хурал дээр Түр хороог ахалж байгаа Д.Ганболд гишүүн биднийг 6 цаг хүлээлгэсэн. Сонсгол хийх өдрийн гэрчийг зарлах тэр хурал. Зургаан цаг хүлээлгэсний эцэст "Нүүрсний сонсголыг хойшлуулъя" гэдэг саналыг оруулж ирээд Түр хорооны гишүүдээр санал хураалгасан. Энэ үед манай намаас Б.Бейсен гишүүн бид хоёр эсрэг байр суурьтай байсан. Харин Ардын намын нэр бүхий гишүүд болон ХҮН-ын дарга Т.Доржханд хойшлуулъя гэдэг саналыг дэмжсэн.

Ингээд түр хорооны хурал цагтаа яваагүй. Тэрнээс хойш хуралдахгүй байна. Г.Ганболд дарга зургаан цагийн турш намынхаа дарга нар дээр байсан юм билээ. Намынхаа дарга нараас чиглэл аваад тэнд зургаан цаг болсон юм байна лээ. Тэгээд хүрч ирээд чиглэлийнх нь дагуу түр хорооны сонсгол явагдаагүй. Зургаан цаг хүлээлгэхдээ Ерөнхий сайд, УИХ-ын даргатай байж байгаад ирсэн. Тэгэхээр МАН-ын удирдлага нүүрсний сонсгол явуулахгүй гэж нөлөөлсөн байна гэдгийг шууд хэлчихье" гэсэн юм.