Ардчилсан нам УИХ сонгуулийн өмнө эмх цэгцэндээ орж, намын дарга Л.Гантөмөрийгөө дэмжихээр санал нэгдэж буй талаархи мэдээлэл гарч байгаа билээ. Тухайлбал, АН-ын үйл ажиллагааг идэвхжүүлэх намын нэр нөлөө бүхий хүмүүсийг багтаасан “Нэг Монгол” хөдөлгөөнийхөн өнгөрсөн амралтын өдрөөр хуралдаж, намын эв нэгдэл, гишүүдийн чадавхыг сайжруулах, шинэ шатанд гаргах зорилгыг танилцуулсан улс төрийн уулзалт хийсэн байна.

 Намын гол хүч болж буй “Нэг Монгол” хөдөлгөөнийг АН-ын шинэ үеийн лидер УИХ-ын гишүүн, УИХ дахь АН-ын бүлгийн дэд дарга Н.Ганибал удирдахаар болжээ. Энэ хөдөлгөөний тухай Н.Ганибал гишүүн хэлэхдээ “УИХ-ын гишүүд санаачлан, АН-ын Үндэсний бодлогын хорооны гишүүдийг оролцуулсан "Нэг Монгол" хөдөлгөөнийг өрнүүлж эхэлсэн. Энэ хөдөлгөөн нь намын эв нэгдлийг хангаж, намынхаа үйл ажиллагаа болон гишүүдийнхээ чадавхийг сайжруулах зорилготой юм” гэв.

 “Нэг Монгол” хөдөлгөөн нь нам доторх фракц гэхээсээ илүүтэй намынхаа үйл ажиллагааг чадавхжуулах зорилготой, АН-ын нэр нөлөө бүхий хүмүүсийг багтаасан томоохон хөдөлгөөн байгуулагдаж улс төрийн үйл ажиллагаагаа идэвхжүүлэн явуулахаар болжээ.

Энэхүү хөдөлгөөн нь ямарваа нэгэн хүнээс хамааралгүй. Харин намын нийт гишүүдийнхээ оролцоог хангасан АН-ын гол хүч болж, олон нийт нийгэмд үйл ажиллагаагаа идэвхийлэн таниулан ажиллах юм байна.

Б.ОД