Иргэний Зориг Ногоон Нам энэ сарын 9-нд аравдугаар Их хурлаа хийлээ. Тус нам өнгөрсөн зургадугаар сард Үндэсний хорооны хурлаа хийж, өөрийнх нь хүсэлтийн дагуу Ц.Ганхуягийг намын даргаас чөлөөлж, дэд дарга, УИХ-ын гишүүн асан Б.Батбаатарыг даргаараа сонгосон юм. Тэгвэл намын дүрмийнхээ дагуу Их хурлаа хийж Б.Батбаатарыг намын даргаараа батламжиллаа.

Их хурлын үеэр ИЗНН-ын дарга Б.Батбаатар “2024 оны сонгуульд хэрхэн оролцох талаар намын Үндэсний хороодын ээлжит болон ээлжит бус хурлуудаар хэлэлцэнэ. Эрх чөлөөний тухайн хуулийг батлуулахын төлөө ажиллана. Монголд эрх чөлөө алга. Санхүүгийн эрх чөлөөтэй хүн эрх чөлөөтэй байж чаддаг.  Засгийн газар ашгийн төлөө нэг ч бизнес хийж болохгүй. Засгийн газар ашгийн төлөө иргэд, ААН-тэйгээ өрсөлддөг байдлыг засна. ДНБ-ээ өсгөх тухай яриад байдаг. Энэ нь ДНБ-ээ өсгөх тоон илэрхийллээр нь нэмэх тухай ярьж байгаа болохоос эдийн засгийн өөр загвар ярихгүй байна. ДНБ-ий өсөлт нь дэлхий нийтэд юу авчирав гэхээр баян хоосны ялгааг асар хол болгосон. Тэгэхээр энэ болохгүй жишиг байх нь. Бид бол хүртээмжтэй эдийн засаг, хүртээмж нь хүмүүсийн амьдрал эрх чөлөөг хангахад хүрэлцэхүйц эдийн засаг буюу тойргийн эдийн засгийг яаж бий болгох вэ гэдэг бодлого гаргаж байгаа.

Ногоон соёл иргэншилд 1000, 1000 жил амьдарсан нүүдэлчин ард түмэн бол Монголын ард түмэн. Энэ ногоон амьдралыг хэрхэн авч явах бодлогыг ИЗНН гаргаж чадна. Энэ чиглэлд мэргэшсэн олон гишүүн манай намд бий. Намын даргын зөвлөхөөр доктор, профессорууд ажилладаг. Энэ хүмүүсийн санаа бодол болон иргэдийн санаа бодлыг тусгана. Хүн өөрөө байгаль. Байгаль өөрөө хүн гэсэн зарчмаар ажиллана” гэлээ.