Нийслэлийн нийтийн тээвэрт хийгдэх шинэчлэлийн үргэлжлэл болсон “ногоон автобус”-ууд асуудал дагуулж, хууль хяналтын байгууллагынхан мөрөөр нь мөшгөж байгаа. Үүнтэй холбогдуулан Тэнүүн- Огоо ХХК-ийн захирал А.Ганхуяг, нийслэлийн нийтийн тээврийн газрын дарга С.Жавхлантбаатар, ийслэлийн Худалдан авах ажиллагааны газрын дарга Б.Түмэнжаргал, нийслэлийн Худалдан авах ажиллагааны газрын Худалдан авах ажиллагааны хэлтсийн мэргэжилтэн Ш.Баярсүх нарын хүмүүсийг саатуулаад байгаа.

Энд нэг жишээ дурдахад, Д.Сумъяабазар хотын дарга болсон цагаасаа “нийтийн тээврийн шинэчлэл”-ийг үе шаттайгаар хийнэ гэж амлаж, түүний ам бардам хэлдэг ажлых нь нэг болсон. Энэ үед буюу 2022 онд Сонгинохайрхан дүүргийн цагдаагийн тасгийг удирдаж байгаад тэтгэвэртээ суусан С.Жавхлантбаатарыг Нийслэлийн нийтийн тээврийн газрын даргаар томилсон. Өөрөөр хэлбэл энэ цаг үеээс шинэ автобус худалдан авах гэрээ хийгдэж эхэлсэн бөгөөд хэл ам дагуулсан “ногоон автобус” оруулж ирэх ажилд голлон оролцсон гэснэ үг.

Гэтэл АТГ-ынхан “Тэнүүн-Огоо” ХХК-ийн удирдлага болон бусад хүмүүсийг саатуулах үеэр нийслэлийн тээврийн газрын дарга С.Жавхлантбаатар нь өөрийгөө хутгалан амиа хорлохыг завдсан Тэрбээр сэхээнд орсон учраас  мөрдөн шалгалтын ажиллагааг түр зогсоогоод байгааг албаны эх сурвалж мэдээлсэн. Ер нь хэн нэгэн авлига, албан тушаал бүр хүн амины онц ноцтой хэрэгт шалгагдахдаа амиа хорлохыг завдана гэдэг байж боломжгүй. Нийтийн тээвэртэй холбоотой авлигын мөсөн уул нурах төдийд ингэж хүний аминд хүрэх дээрээ тулж байгаа бол үүний цаана бүр өөр зүйл байгааг харуулж байж ч мэдэхээр юм.

Ямартай ч АТГ-аас А.Ганхуяг, С.Жавхлантбаатар нарын хүмүүсийг 30 хоногийн хугацаатай саатуулсан бөгөөд одоогоор шалгалтын ажиллагаа үргэлжилж байна гэж мэдээлсэн. Харин “ногоон автобус”-ны дуулиан нийгэмд дарагдаж, Хотын дарга асан Д.Сумъяабазар албан тушаалаасаа огцорсон болоод алга боллоо.