УИХ-ын гишүүн асан, хуульч О.Баасанхүү саяхан хэвлэлд өгсөн нэгэн ярилцлагадаа “...Нүүрсний хэргийн сонсголоор маш ноцтой асуудлууд яригдсан. Баримттай хулгайн гэмт хэргүүд яригдсан. Гэтэл УИХ-ын гишүүн С.Батболдын нөгөө л “бөөсний онигоо” гэдэг шиг л нэг хүн гараад ирэнгүүт нь хамаатан болгоод, хамаатан юм чинь хамааралтай байж таараа, хамааралтай юм чинь хулгайч байж таараа гээд улс төрийн пиар хийгээд байна. Яг бодитой цаана нь яригдаж байгаа гэмт хэргийн хохирол, оролцоо, гэмт хэргийн шалтгаан нөхцөлийг гаргаж, тогтоосон зүйл алга. Баримттай нүүрсний гэмт хэргүүдийг гаргаж ирүүлэхгүйн тулд “хошин шог” хийгээд байх вий” гэж ярив.

Өнгөрсөн сард болсон нүүрсний сонсголын дуулиантай холбоотойгоор нэр бүхий зарим нэг улстөрчдийн нэрийг хавчуулах, нэр хоч өгч, улс төрийн хар пиарыг зориудаар явуулах болсон нь үнэн. Үүний нэгэн жишээ нь УИХ-ын гишүүн С.Батболдыг нүүрсний хэрэгт огт хамааралгүй байхад түүний нэр төрд халдсан, худал мэдээлэл удаа дараа гарч байгаатай холбоотойгоор ажлын албанаас нь мэдэгдэл саяхан гаргаж байсан.

Энэ нь нүүрс ачдаг, жинхэнэ утгаараа нүүрсний хулгайтай холбогдсон хүмүүсийг олны анхаарлаас холдуулах, нүүрсний жинхэнэ хулгайн хэргийг сарниулах, шударга үнэнийг тогтоох ажлыг төөрөгдүүлэх гэсэн зорилготой байхыг ч үгүйсгэхгүй юм.