Сонгуулийн өмнө зарим улстөрчдийг зориудаар гадна дотнын хэвлэлээр захиалж “нүддэг” технологи яваад даруй удлаа. Энэ 2024 оны сонгуулиар өнөө танил технологи бас л хэрэгжиж эхлэв бололтой. Ямартаа ч сүүлийн өдрүүдэд Ерөнхийлөгч асан Цахиагийн Элбэгдоржийг  “оффшор бүс дэх хөрөнгө илэрлээ, АНУ-ын Бостон хотод 700.000 ам.долларын үнэ бүхий тансаг зэрэглэлийн хаусыг өөрийн өргөмөл охин Ануужингийн нэр дээр авсан нь баримтаар нотлогджээ" гэх мэдээлэл сошиалаар дүүрэн цацагдав. 

Энэ мэт гадаад, дотоодын хэвлэлээр “нүддэг” технологийн талаар нэрт нийтлэлч Баабар саяхан жиргэхдээ: Жэнко АНУ руу ерөнхий прокуроороо дагуулж яваад Трамптай уулзан, Санж.Баярын хулгайн 7 байшинг олж өгч туслаач гэж гуйж. Хүсэлтийг хүлээж аваад АНУ-ын прокурортой холбож өгсөн. Удалгүй “АНУ-д хайгаад тийм зөрчил олдсонгүй, өгсөн хаяг дээрх байрууд бүгд эзэнтэй, зохих ёс журмын байна” гэсэн хариу иржээ. Тэгэхээр нь ОТ руу бензин шахсан гэж гүжирдээд шорон хийсэн. Нэг эхлүүлсэн юмаа дуусгахаас өөр аргагүй болсон юм шиг билээ” гэж жиргэсэн. 

Үнэхээр ч энэ үеэр Ерөнхий сайд асан С.Баярыг гадаадад олон хаус үл хөдлөхтэй гэх мэдээлэл Монголын хэвлэл мэдээллийн хэрэгсэл, сошиалаар цацагдаж байсан ч энэ нь эцэстээ тогтоогдоогүй чимээгүй өнгөрсөн. Харин С.Баяр гэдэг хүн гадаадад олон хаустай гэх нэртэй үлдсэн. 

Одоо Ерөнхийлөгч асан Ц.Элбэгдоржийн АНУ дахь хаус үнэн эсэх нь тодорхойгүй ч энэ нь сонгуулийн өмнө гаргаж ирсэн хар пиар байх магадлал тун өндөр. Жэнко технологи гэж нийтлэлч Баабарын нэрлэсэнчлэн гадны хэвлэлд захиалгат мэдээлэл гаргадаг энэ технологийн дагуу гүтгүүлж ирсэн улстөрчид цөөнгүй бий.