Засгийн газраас орон даяар хэрэгжүүлж буй “Шинэ хоршоо” хөдөлгөөний хүрээнд Завхан аймгийн Тосонцэнгэл сумын Идэр багийн “Гурван толгодын шим” хоршоо хөрөнгө оруулалтын зээлээ авсан анхны хоршоо боллоо. Тус хоршоо нь нийт 120 сая төгрөгийн хөрөнгө оруулалтын зээл авах гэрээгээ Төрийн банктай өнөөдөр байгуулсан нь энэ юм.

“Гурван толгодын шим” хоршоо нь сүүний үнээ, 10 га талбайн услалтын систем, хадлан тэжээл бэлтгэх трактор тоног төхөөрөмж зэргийг цогцоор нь худалдан авах төсөл бичсэн байна. Мөн ногоон тэжээл тариалах, үрийн будаа худалдан авах зэрэгт санхүүжилтээ зарцуулна гэж төлөвлөсөн талаар гишүүн малчид нь ярилаа. Хоршооны гишүүд өөрсдийн мал хөрөнгөө барьцаалж хөрөнгө оруулалтын зээлд хамрагджээ.

Зөвхөн орон нутагт салбартай банк төдийгүй “Шинэ хоршоо” хөдөлгөөнийг дэмжин арилжааны 7 банк өөрийн эх үүсвэрээс бэлэн бусаар хөрөнгө оруулалтын зээл гаргах боломжтойгоо илэрхийлэн санхүүжилтийн ерөнхий гэрээнд гарын үсэг зурсан. Зээлийн батлан даалтын сангаас хоршооны зээлд 80-100 хувийн батлан даалт хийнэ. Зээлийн хугацаа 3-5 жил байх бөгөөд эхний жилд эргэн төлөлт хийгдэхгүй.

Одоогоор “Шинэ хоршоо” хөдөлгөөнийг Хаан банк, Төрийн банк, Худалдаа хөгжлийн банк, Голомт банк, Хас банк, Ариг банк, Богд банк дэмжиж өөрийн эх үүсвэрээс зээл гаргахаа мэдэгдээд байгаа билээ. Засгийн газраас санаачилсан “Шинэ хоршоо” хөдөлгөөн амьдрал дээр хэрэгжих боломжтойг банк, санхүүгийн салбар хүлээн зөвшөөрч дэмжиж буй нь энэ юм. “Шинэ хоршоо” хөдөлгөөний үр дүнд илүү чинээлэг мал аж ахуйн салбарыг бий болгох боломжтой гэж Засгийн газар үзэж байгаа юм.