Халх голын тулалдааны 80 жилийн ойг ОХУ-тай хамтран энэ жил тэмдэглэх ажлын хүрээнд тус сумын төвийг шинэчлэх “Шинэ сум” төсөл хэрэгжиж буй. Дорнод аймгийн Халх гол суманд өрнөж буй бүтээн байгуулалтын ажилтай өнгөрсөн даваа гарагт Ерөнхийлөгч танилцжээ.
“Шинэ сум” бүтээн байгуулалтын ажлын хүрээнд Халх гол сумын ЗДТГ, 250 хүний суудалтай соёлын төв, 20 ортой эмнэлэг, 650 хүүхдийн багтаамжтай сургууль, 150 хүүхдийн цэцэрлэг, 180 хүүхдийн дотуур байр, спорт заал гэх мэт 11 байгууламж барьж байна. Ингэхдээ дэд бүтэц буюу халуун, хүйтэн ус, ариун цэврийн байгууламжийг шийдэж байгаа аж. Бүтээн байгуулалтыг “Их модун” компани гүйцэтгэж байгаа бөгөөд 120 гаруй хугацаат цэргийн алба хаагч, 200 орчим ахлагч, офицер, нийт 500 гаруй хүн ажиллаж байна. Энэ үеэр Ерөнхийлөгч Х.Баттулга “Бид XX зууны хөдөөгийн бодлогыг 1950, 60-аад онд гаргаж байсан. Одоо бид XXI зууны шинэ хөдөө, орон нутгийн бодлогоо гаргах ёстой. Үндсэн хуулийн нэмэлт, өөрчлөлтийн асуудлыг бүх түвшинд ярьж, хэлэлцэж эхэлсэн энэ үед тус хуулийн төсөлд тусгасан засаг, захиргааны асуудлыг хөндөж ярилцах хэрэгтэй. Халх гол сумаар жишээ авахад, Улаанбаатар хотоос 1000 гаруй км зайтай энэ бүс нутагт газар тариаланг хөгжүүлж хөрш зэргэлдээ улс, хот руу бүтээгдэхүүн экспортлох боломж бий. Өөрөөр хэлбэл, орон нутагт нь ямар нэг байдлаар боловсруулах үйлдвэр барих зэргээр төрөөс бодлогоор дэмжих шаардлагатай. 2019 оны есдүгээр сарын 3-нд бид 80 жилийн ойгоо тэмдэглэнэ. Энэ үед шинэ сумын бүтээн байгуулалт дуусч, үйл ажиллагаа нь жигдэрчихсэн байх болов уу. Энэ мэтээр бид алслагдсан 100 гаруй сум, орон нутгаа хөгжүүлэх шаардлагатай” гэв.