Ерөнхий сайд У.Хүрэлсүх Тост, Тосон бумбын ордтой холбоотой асуудлаар Уул уурхайн сайд Д.Сумъяабазар, Байгаль орчин, аялал жуулчлалын сайд Н.Цэрэнбат, МХЕГ-ын дарга Н.Цагаанхүү, ЦЕГ-ын дарга С.Баатаржав, Тагнуулын ерөнхий газрын дарга Д.Гэрэл, Ашигт малтмал, газрын тосны газрын дарга Х.Хэрлэн болон бусад холбогдох албаны хүмүүстэй өчигдөр уулзалт хийж, үүрэг даалгавар өглөө.

Ерөнхий сайд У.Хүрэлсүх “Сүүлийн үед уул уурхайн салбарт ажиллаж байгаа зарим нэг олигархууд Монгол төрийн хуулийг ихээхэн зөрчиж байна. Уул ус хилэгнүүлж, ард түмнийг уйлуулж байна. Гурвантэс сумын иргэд газар нутгаа хамгаалж, уйлан хайлан ярьж байна. Тэд төрөөс юу ч гуйгаагүй. Ард түмэн газраа ухуулахгүй гээд байхад яагаад энэ газрыг ухаад байна вэ. Анхнаасаа хууль зөрчиж олгогдсон лиценз гэж ойлгож байгаа. Энэ асуудлаар би холбогдох хүмүүст үүрэг даалгавар өгч, УИХ-ын гишүүн Б.Чойжилсүрэнд хэд хэдэн удаа анхааруулж хэлсэн. Яасан ханаж цаддаггүй их шунал вэ. Эх орны газар сэндийчиж, ард түмэн бухимдуулж байдаг. Хувьдаа ашиг, орлого олно гэж УИХ-ын гишүүнээр сонгогддоггүй. Албан тушаалтныг авлигаддаг байсан бол ард түмнийг авлигадах гэж оролдож байна, тагнуул, цагдаагийн дарга нар аа. Та нар хэлэлцүүлэг дээр харсан байх. Гурвантэс сумын иргэн н.Нямдаваа хэлсэн. Түүнд 3-5 сая төгрөгийн хахууль өгөх гэж оролдсон гэдгийг. Нүдэн дээр чинь авлигын хэрэг яригдаж байхад яагаад цагдаагийн байгууллага үүнийг шалгахгүй байна вэ. “Сауд гоби коэл транс”-т өгсөн ашигт малтмалын лицензийг хуурамчаар үйлдсэн байна. Яагаад үүнийг олж харахгүй байна вэ, байгаль орчин, уул уурхайн сайд нар аа. Энэ асуудалд хэрэг үүсгэж шалга. 370 мянган тонн нүүрсний хулгайн хэрэг юу болсон бэ. Ерөнхий сайд нэг жилийн өмнө үүрэг өгсөн. Шалгаж байна л гээд байдаг. Үр дүн нь хаана байна. Ашигт малтмалын лицензийг цуцалж, Тост, тосон бумбын ордыг улсын тусгай хамгаалалтад авах ёстой. Өнөөдөр шийдвэр гаргаж, тус компанийн ашигт малтмалын лицензийг цуцлах үүрэг өгч байна, би. Тэнд байгаа машин, техник хэрэгслийг нь журамла, цагдаагийн дарга аа. Та өөрөө газар дээр нь очиж ажилла. Ард түмэнд хээл хахууль өгөх гээд байгаа нөхдүүдэд хэрэг үүсгэж, шалга. Хууль бусаар олборлолт хийсэн “Сауд гоби коэл транс” компаниар нөхөн сэргээлтийг нь хийлгэ. Энэ ажлыг хийж чадахгүй бол сайд болон даргын ажлаа өг” гэв.

Энэ уулзалтын дараа БОАЖ-ын сайд Н.Цэрэнбат тодорхой санал гаргасан байна. Тэрбээр энэ талаар хэлэхдээ, “Ерөнхий сайд үүрэг өгсөн. Гэхдээ энэ асуудал өмнө нь манай яамнаас ажлын хэсэг гарч, холбогдох хүмүүс нь газар дээр нь очиж танилцсан байсан асуудал. Өмнөх Засгийн газрын үед өргөтгөлөөр авах талбайг өөрчилсөнтэй холбоотойгоор БОАЖЯ-наас УУХҮЯ-нд Ашигт малтмалын тухай хуулийн 56.1.5-д заасан үндэслэлээр цуцлах дүгнэлтээ өнөөдөр (2019 оны наймдугаар сарын 12) хүргүүлж байна. Энэ хуульд заасан үндэслэлд тусгай зөвшөөрөл эзэмшигч байгаль орчинд хортой үйл ажиллагаа явуулж байгаа эсвэл нөхөн сэргээх, байгаль орчны менежментийн төлөвлөгөөнд заасан үүргээ биелүүлээгүй талаар орон нутгийн төр захиргааны байгууллагын саналыг үндэслэн байгаль орчины асуудал эрхэлсэн төр, захиргааны байгууллага дүгнэлт гаргана гэсний дагуу бичиг баримт бүрдсэн учраас цуцлах санал хүргүүллээ. Энэ асуудал шийдэгдэх байх. Ингээд энэ лхагва гаргийн Засгийн газрын хуралдаанаар байгалийн нөөц газрын өргөтгөлөөр авах асуудлыг БОАЖЯ-наас оруулна” гэв.