Б.Хурц нарын есөн хүнд холбогдох хэргийг Төв аймаг дахь Сум дундын Эрүүгийн хэргийн анхан шатны шүүх хурал өчигдөр /2019.08.13/ хоёр дахь өдрөө үргэлжилсэн. Үдийн 13:00 цагийн орчимд хурал завсарласан бөгөөд энэ үеэр өмгөөлөгч Г.Батбаяр ярихдаа, “Шүүх хуралд 30 гаруй хүн оролцож байгаа учир удааширч байна. Шүүх хурлыг 100 цаг хуралдана гэж үзвэл уг хурал талдаа л орж байна. Шүүх хурлын шийдвэр гарах хүртэл олон шат дамжлага, асуулт хариултууд явагдана. Олон хүнтэй шүүх хурал учир магадгүй өнөөдөр шүүх хурлын шийдвэр гарахгүй ч байж болох талтай” хэмээсэн юм.

Эх сурвалжийн мэдээлж буйгаар, хаалттай хуралдаан 17:00 цагийн орчимд хохирогч нараас мэдүүлэг авч эхэлсэн гэнэ. Энэ үеэр хохирогч Т.Чимгээгийн даралт ихэсч, бие нь муудсан байна.
Мөн шүүгдэгч нарын өмгөөлөгч Б.Батбаяр "олонд цацагдсан бичлэгт үзүүлсэн зүйл бол эрүү шүүлт биш. Харин ялтан хоорондын танхайрал" гэж мэдэгдсэн. Гэвч энэ удаагийн хуралд Б.Амгаланбаатарыг гэрчээр оруулсан нь олны анхаарлыг татаж байгаа юм.
Шүүх хурал маргааш өглөө 09:00 цагт үргэлжилнэ.