УИХ-ын Төрийн байгуулалтын байнгын хорооны өнгөрсөн баасан гаргийн хуралдаанаар хоёр асуудал хэлэлцэлгүй орхисон. Тодруулбал, Үндсэн хуулийн нэмэлт, өөрчлөлтийн хуулийн төсөл дэх газрын баялаг болон Шүүхийн ерөнхий зөвлөлтэй холбоотой зарчмын зөрүүтэй санал байв.

Монгол Улсын Ерөнхийлөгчөөс өргөн мэдүүлсэн Монгол Улсын Үндсэн хуульд оруулах нэмэлт, өөрчлөлтийн төсөлд Үндсэн хуулийн Зургадугаар зүйлийн 6.2-ыг “Монгол Улсын иргэдэд өмчлүүлснээс бусад газар, түүнчлэн газрын хэвлий, түүний баялаг, ой, усны нөөц, ан амьтан нь нийтийн өмч мөн” хэмээн өөрчлөх санал оруулж ирсэн юм. Харин УИХ-ын гишүүн Д.Лүндээжанцан нарын 62 гишүүний өргөн барьсан хуулийн төслийн 6.2. "Монгол Улсын иргэдэд өмчлүүлснээс бусад газар, түүнчлэн газрын хэвлий, түүний баялаг, ой, усны нөөц, ан амьтан төрийн өмч мөн” гэж тусгасан. Уг асуудалд зарчмын зөрүүтэй санал гарсан тул МАН-ын бүлэг хуралдаж, Монгол Улсын иргэдэд өмчлүүлснээс бусад газар, түүнчлэн газрын хэвлий, түүний баялаг, ой, усны нөөц, ан амьтан нь төрийн, нийтийн өмч мөн” хэмээн өөрчлөхөөр шийдвэр гаргажээ. Энэ талаар МАН-ын бүлгийн дарга Д.Тогтохсүрэн мэдээлэл өглөө.

Тэрбээр “Байгалийн баялаг төрийн, нийтийн өмч байх нь зөв гэдэгт бүлгийн гишүүдийн олонх нэгдлээ. Шууд нийтийн өмч болгох нь байгалийн баялгийг хэт задгай орхих байдалд хүргэхийг үгүйсгэхгүй. Тиймээс төрийн, нийтийн өмч гэж өөрчлөхөөр тогтлоо. Энэ нь илүү тодорхой болгож байгаа юм. Шууд нийтийн гэчихвэл иргэн хүн байгалийн баялгийг ямар ч зөвшөөрөлгүй захиран зарцуулах эрх үүснэ. Жишээ нь, бидний хэлдэг нинжа нарт газрын хэвлийг ухах эрхийг нь олгох болчхоод байгаа юм. Тиймээс төрийн, нийтийн өмч гэж заахаар болсон. Хоёрдугаарт, шүүхтэй холбоотой гишүүдийн өргөн барьсан хуулийн төсөлд ес, Ерөнхийлөгчийн төсөлд дөрвөн заалт байсныг нэгтгэн ярилцаад нийт гурван заалт болгон оруулж байгаа. Нэгдүгээрт, шүүхийг яаж байгуулах тухай, хоёрдугаарт, Шүүхийн ерөнхий зөвлөл ямар бүтэцтэй байх, гуравдугаарт, шүүгчид сахилгын шийтгэл ногдуулах зорилгоор Шүүхийн сахилгын хороо ямар бүтэцтэй байх вэ гэсэн үндсэн гурван асуудал тусгасан. Бусад заалтууд болох шүүгчид тавих шаардлага, Улсын дээд шүүхийн шүүгчийг томилохдоо томилгооны сонсголд оруулж, томилох зэргийг төслөөс хасч, Шүүхийг хуулиар нь зохицуулна" гэв.

Харин сонгуулийн тогтолцооны тухайд тэрбээр тодорхой заалтгүйгээр иргэд УИХ-ын гишүүнийг сонгох ёстой болохоос биш улс төрийн намыг сонгож болохгүй гэж үзээд Үндсэн хуульд тогтолцоог тусгах нь зохисгүй гэдгийг тодотгов. Өөрөөр хэлбэл, МАН-ын бүлэг намын жагсаалтыг дэмжихгүй байгаагаа илэрхийллээ. Харин УИХ-ын гишүүдийн тоог нэмэх эсэхийг бүлгийн нийт 64 гишүүнээс нэг бүрчлэн нууцаар санал хураажээ. Санал хураалтад бүлгийн гишүүдийн олонх нь гишүүдийн тоог 99 болгох нь зөв гэж үзсэн байна.