Ц.ХАС

 Цэвэр, шатагч устөрөгч үйлдвэрлэх дэлхийд томд орох үйлдвэрийг Японы зүүн хойд нутгийн 2011 оны газар хөдлөлд нэрвэгдсэн газрыг сэргээн босгохтой хамт өнгөрсөн долоо хоногийн бямба гарагт нээсэн байна. Газар хөдлөл, цунамийн үеэр сүйрсэн Фукушима-Дайчи атомын цахилгаан станцаас умар зүгт байдаг Намие хотод нарны үүсгүүрээр ажиллах ус төрөгчийн энэ үйлдвэр-станц нь өдөрт 560 автомашиныг устөрөгчөөр цэнэглэх хэмжээний түлш үйлдвэрлэх хүчин чадалтай гэнэ.
Ёслолд оролцсон Японы Ерөнхий сайд Шинзо Абэ Засгийн газрын төслийг дэмжиж оролцсон Toshiba, Tohoku Electric Power болон байгалийн хийн борлуулагч Iwatani компанийханд талархал илэрхийлжээ.
Японы Засгийн газрын хувьд зуны олимпын тоглолттой холбоотойгоор байгаль орчны бохирдлын талаар ихээхэн шүүмжлэл сонсч байгаа энэ үед ийм үйлдвэр ашиглалтад орж байгаа нь томоохон боломж байлаа. Хамтрагч түншүүд нь ч цаашлаад устөрөгч үйлдвэрлэх технологио гадаадад гаргах боломжтой гэж харж байна.
Устөрөгчийг өөр бусад орнуудад сэргээгдэх эрчим хүч ашиглан үүнээс бага зардлаар үйлдвэрлээд Япон руу авчирч болох юм” гэж Iwatani компанийн гүйцэтгэх захирал Манабу Цуйоши хэлсэн байна.
Японы хувьд үнэхээр сэргээгдэх эрчим хүч үйлдвэрлэх нь дулааны болон цөмийн эрчим хүчнээс арай илүү зардалтай байгаа юм. Албан ёсоор “Фукушимагийн устөрөгч-эрчим хүчний судалгааны талбай” нэртэй энэ үйлдвэр нь японы төрийн байгууллагуудаас эрчим хүч, үйлдвэрлэлийн технологийг хөгжүүлэх төслийн нэг хэсэг юм. Энэ төслийг Япон нийтдээ 189 сая ам.долллароор хэрэгжүүлж байгаа юм.
Nikkei хэвлэлд бичсэнээр бол энэ үйлдвэр нарны эрчим хүч ашиглан усыг задалж ус төрөгч гарган авдаг байна. Ус төрөгч нь тэг хаягдалтай түлш хэмээн нэрлэгддэг. Намиен үйлдвэрийн үйлдвэрлэсэн устөрөгчийг авто цистернээр зөөн Токио зэрэг том хотуудын хэрэглэгчдэд хүргэх юм байна. Үүний зэрэгцээ Японы эрх баригчид Токио-2020 зуны олимпын тоглолтын үеэр олимпын тосгод, амралтын газруудад эрчим хүч үйлдвэрлэх зорилгоор устөрөгчөө ашиглахаар тооцож байгаа юм.

эх сурвалж :"Ардчилал таймс сонин"