Афганистаны “Талибан” хөдөлгөөн тус улсын нийслэл Кабул хотод болсон таван хүний аминд хүрсэн дэлбэрэлтийн хариуцлагыг хүлэнэ гэжээ. Дэлбэрэлтийн улмаас таван хүн амь алдаж, олон хүн шархадсан байна. Халдлага АНУ-ын дипломатын дээд хэмжээний төлөөлөгч Афганистанд ирэх үеэр тохиов. Дэлбэрэлт есдүгээр сарын 2-нд Кабул хот дахь олон улсын байгууллагууд байрладаг “Ногоон бүс” хэмээх дүүрэгт болжээ. Хүчтэй дэлбэрэлтийн улмаас уг дүүргийг эрчим хүчээр хангадаг цахилгаан станцын генератор эвдэрсэн байна. АНУ-ын дипломат Афганистаны Ерөнхийлөгч Ашраф Ганитай уулзаж энхтайван тогтоох тухай гэрээний талаар ярилцахаар ирсэн байв. “Талибан” хөдөлгөөний төлөөлөгч гадаадынхан оршин суудаг газарт халдлага үйлдсэн гэдгийг мэдэгджээ. Тэсрэх бөмбөг байрлуулсан автомашин дэлбэрсний дараа алан хядагчид гал нээсэн байна. Афганистаны Дотоод хэргийн яамны төлөөлөгч халдлагын улмаас таван хүн амь үрэгдэж, 50 гаруй хүн шархадсан хэмээн мэдэгдэв.

АНУ-аас “Талибан” зэвсэгт бүлэглэлтэй хийсэн хэлэлцээрийн дагуу цэргээ Афганистанаас гаргахаар болсон. Тохиролцооны дагуу АНУ 20 долоо хоногийн дотор 5400 цэргээ Афганистанаас гаргах аж. Цэргээ гаргасны хариуд “Талибан” бүлэглэлээс АНУ болон түүний холбоотны эсрэг халдлага, дайралтад Афганистаныг бааз болгож ашиглахгүй гэж тохиролцжээ. Афганистанд одоогоор АНУ-ын 14 мянган цэрэг байрлаж буй.
“Талибан” хөдөлгөөнтэй хийсэн хэлэлцээрийн зарим заалтыг АНУ-ын Төрийн департментын Афганистаны асуудал хариуцсан тусгай төлөөлөгч Замлая Халилзад анх удаа телевизийн ярилцлагын үеэр тодруулжээ. Хэлэлцээрт АНУ-ын Ерөнхийлөгч Дональд Трамп гарын үсэг зурснаар хүчин төгөлдөр болох юм. АНУ болон “Талибан”-ы төлөөлөгчид Катарт найман удаа уулзсаны эцэст тохиролцоонд хүрч чадсан.
2001 онд Афганистанд АНУ-ын цэрэг орж ирснээс хойш “Талибан” хөдөлгөөний тус улсад хяналтаа тогтоосон газар нутгийн хэмжээ нэмэгдсээр байгаа юм. Өнгөрсөн хугацаанд Афганистанд олон улсын цэргийн эвслийн 3500 гаруй цэрэг, алба хаагч амь үрэгдсэний 2300 гаруй нь америкчууд байжээ. НҮБ-ын мэдээлснээр энэ оны хоёрдугаар сарын байдлаар Афганистанд амь үрэгдсэн энгийн иргэдийн тоо 32 мянга болсон байна.