Хятадын Засгийн газраас Дэлхийн худалдааны байгууллагад АНУ-ын эсрэг зарга үүсгэжээ. Хятадын худалдааны яамны мэдээлснээр АНУ-аас сүүлд ногдуулсан импортын тариф нь өмнө нь Японы Осака хотод болсон хоёр орны төрийн тэргүүн нарын зөвшилцлийг зөрчсөн гэж буруутгаж байна. Өчигдрөөс хүчин төгөлдөр үйлчилж эхэлсэн АНУ-ын импортын тариф нь Хятадад үйлдвэрлэсэн гутал, ухаалаг цаг, зурагт зэрэг 112 тэрбум ам.долларын өртөг бүхий барааг хамарч байна. Харин Хятадын талаас АНУ-ын түүхий нефтид ногдуулах гаалийн татвараа нэмэгдүүлсэн аж. АНУ болон Хятадын хооронд үргэлжилж буй худалдааны зөрчил сүүлийн хэдэн долоо хоногт газар авч, хурцдаад байна. Үүний зэрэгцээ АНУ-аас ирэх арванхоёрдугаар сарын 15-аас эхлэн Хятадын 160 тэрбум ам.долларын бараа бүтээгдэхүүнд 15 хувийн гаалийн татвар ногдуулахаар төлөвлөжээ. Харин Хятадын талаас мэдээлэхдээ АНУ-ын 75 тэрбум ам.долларын бараанд татвар ногдуулахаар болов. Цагаан ордны тэргүүн Дональд Трамп АНУ-ын эрх ашгийг хамгаалж, олон жил алдагдалтай явж ирсэн нөхцөл байдлыг өөрчлөх алхам хийж эхэлснээр Хятадтай худалдааны зөрчлийг эхлүүлсэн юм.