“Дорион” хар салхи ойртож байгаатай холбогдуулан АНУ-ын ерөнхийлөгч Дональд Трамп Умард Каролина мужид онц байдал тогтоолоо гэж Онц байдлын холбооны удирдах газрын албан сайтад мэдээлжээ.
Бүхий л нөөц бололцоогоо дайчлан, хар салхинаас учирч болох хохирлыг урьдчилан тооцож шаардлагатай арга хэмжээ авахыг Ерөнхийлөгч Онцгой байдлын албанд даалгасан байна. Умард Каролина мужийн амбан захирагч Рэй Купер мужийнхаа 100 тойрогт онц байдал зарлаад байгаа юм. Тэр бас мужийнхаа иргэдэд эхний ээлжинд хэд хоногтоо хүрэлцэх хэрэгцээт цэвэр ус, хүнс бусад бараа нөөцөлж авахыг уриалсан юм. Өнөөдрийн байдлаар Багамын хэд хэдэн арлуудыг хамран салхилж байгаа “Дорион” хар салхины улмаас долоон хүн амь алдаад байгаа юм. Цаг уурчдын мэдээлж байгаагаар хар салхи АНУ-ын зүүн өмнөд эргийг дайрах төлөвтэй байна. Есдүгээр сарын 3-ны байдлаар хар салхи Багамын арлуудад тавдугаар зэргээс хоёрдугаар зэрэгт шилжиж цагт 175 км-ийн хурдтай салхилж байна.
Ойртож байгаа хар салхинаас сэрэмжилж Өмнөд Каролина, Жоржия, Флорида мужуудад бас онц байдал зарлаад хүмүүсийг нүүлгэн шилжүүлж байна. Орон нутгийн засаг захиргааны төлөвлөснөөр бол эрэг орчмын нэг сая гаруй хүнийг нүүлгэн шилжүүлэхээр тооцоолжээ.