Крымын тэргүүн Сергей Аксёнов Украины Ерөнхийлөгч Владимир Зеленскийг хойгтоо урихдаа түүнийг “Ард түмний зарц” цувралын Василий Голобородькогийн дүрийн төрхөөсөө ангижрахыг зөвлөлөө гэж “Крым 24” телевизийн “Нухацтай яриа” хөтөлбөрт оролцох үеэрээ мэдэгджээ.
“Өнөөдөр Зеленскийд нэр хүнд, итгэл найдвар байна. Гэхдээ ОХУ-тай найрамдал, харилцан уялдаа тогтоох талаар тодорхой ахиц амжилт гаргахгүй бол Украины ард түмэн дүнгээ тавина гэдэгт би итгэлтэй байна. Ийм болохооор ноён Зеленский өөрийнхөө киноны дүрээсээ ангижирч, жирийн иргэдийн амьдралтай холбоотой асуудлуудыг шийддэг ерөнхийлөгчийн дүрдээ орох хэрэгтэй” гэж Аксёнов хэлсэн байна.

Крымын тэргүүнийхээр бол Зеленский өнөөдөр ямар байдалд байгаагаа сайн ойлгохгүй байгаа гэнэ. “Минийхээр бол тэр өнөөх киноныхоо дүр Голобородькогийнхоороо л байж, ингэснээрээ хаашаа унахаа мэдэхгүй л байх шиг” гэж Аксёнов хэлжээ.
Тэр бас Украины тэргүүнийг Крымын хойд хэсэг дэх хил дээр хүрэлцэн ирэхийг уриад “Инээдэмтэй ч юм аа даа. Чонгарт хүрэлцэн ир л дээ. Ялтад өөрийнх нь байшин бий. Ер нь ирээд юу болж байгааг үз, хүмүүс Украиндаа эргэн оръё гэж байна уу, үгүй юу тэднээс асуу. Крымчүүд юу хүсч байгааг, юу ярихыг сонс” гэж онцолсон байна.
Аксёнов бас украины тэргүүнийг хойгийнхоо нутгаар дагуулан явж аялуулахад бэлэн байгаагаа илэрхийлжээ. “Би гадаад хэргийн сайдын үүрэг гүйцэтгэж байгаагийн хувьд манай ерөнхийлөгч ноён Зеленскийг урих юм бол энд юу болж байгааг харуулж, түүний үзэл бодлыг өөрчилж болох юм. Гагцхүү ингэснээр нэг их дэвшил гарахгүй болов уу л гэж эмээж байна” гэж яриагаа төгсгөжээ.
Голдүрд нь Владимир Зеленскийн тоглосон украины телевизийн инээдмийн “Ард түмний зарц” цуврал украины телевизээр 2015-2019 онд гарсан юм. Тэр жирийн нэг багш байснаа санамсаргүйгээр улсын ерөнхийлөгч болж байгаа тухай гардаг юм.