Сирийн зүүн хойд нутагт байгаа, америкчуудын дэмждэг “Сирийн ардчилсан хүч” бүлэглэлд зориулан  аюулгүй байдлын бүс байгуулах гэж байна, харин Анкараг дэмжихгүй байна хэмээн Туркийн Ерөнхийлөгч Режеп Тайип Эрдоган АНУ-г буруутгажээ. Тэрээр NTV телевизэд өгсөн шууд ярилцлагынхаа үеэр ингэж мэдэгдсэн байна.
“Яг өнөөдөр Турк Сирийн умард нутгийг алан хядагч бүлэглэлээс  чөлөөлөхийг эрмэлзэж байна, харин АНУ биднийг бас тэднийг нэгэн зэрэг удирдахыг хүсч байна. АНУ тэнд бидэнд биш харин террористуудад зориулан аюулгүй байдлын бүс байгуулах гэж байна. Үүнийг бид хүлээн зөвшөөрөх боломжгүй юм” гэж Туркийн тэргүүн хэлснийг ТАСС агентлаг эш татжээ.
Террорист энэ байгууллага нь Туркийн газар нутаг дахь курдуудын “Ардын батлан хамгаалах хүч” байгууллагын бүрэлдэхүүнд багтдаг юм байна.

АНУ-ын агаарын цохилтоос болоод Сирийн Идлиб мужид тогтвортой байдал алдагдаж байна гэж Эрдагон хэлээд Евфрат голын зүүн эрэгт аюулгүй байдлын бүс байгуулах гэж байгаа бол есдүгээр сарын сүүлчээс АНУ-тай хамтрахгүй,  Турк дангаараа ийм алхам хийж чадна гэсэн байна. Энэ талаарх хэлэлцээр дээр санал зөрөлдсөөр байгаа гэж Туркийн тэргүүн онцолжээ.
“Хэлэлцээрийн үе шат бүхэнд энэ асуудлаар туркийн ч, америкийн ч  зорилго өөр байгаа” гэж Эрдоган тэмдэглэсэн байна. Өчигдөр АНУ, Туркийн цэргийнхэн Сирид байгуулах гээд байгаа аюулгүйн бүсийн хамрах нутагт анх удаа газрын эргүүл хийсэн юм.