ОХУ-ын Ерөнхийлөгч Владимир Путин, Францын тэргүүн Эммануэль Макронтой утсаар ярьж Украины нөхцөл байдлын талаар санал солилцлоо хэмээн Оросын төрийн тэргүүний хэвлэлийн алба мэдээлжээ.
Тэд юуны түрүүнд орос украин хоёр хоригдлуудаа “35:35” гэсэн хэлбэрээр солилцсон хүмүүнлэгийн арга хэмжээг нааштай үнэлж байгаагаа илэрхийлсэн байна. Улмаар хоёр ерөнхийлөгч Донбасс дахь нөхцөл байдлыг тогтворжуулах талаар цаашид хэрхэх талаар санал бодлоо солилцсон гэж хэвлэлийн албаны мэдээлэлд өгүүлжээ. В.Путин энд “Нормандын дөрвөл”-ийн дээд хэмжээний уулзалтад бэлтгэх шаардлагатай байна гээд Киев энэ талаар 2015, 2016 онд тохиролцоонд хүрсэн үүргээ биелүүлэх хэрэгтэй гэсэн байна. Хоёр орны тэргүүн Украины дорнод нутагт нөхцөл байдлыг тогтворжуулахад “Минскийн иж бүрэн арга хэмжээ”-нээс өөр арга зам үгүй гэдгийг онцлон тэмдэглэжээ.
Үүний өмнө ОХУ-ын Ерөнхийлөгч В.Путин, Украины төрийн тэргүүн Владимир Зеленскийтэй утсаар ярьсан юм. Тэд бас хоригдлуудаа солилцох тухай яриад, Украины дотоод сөргөлдөөнийг тогтворжуулах асуудлаар санал солилцож “Нормандын дөрвөл”-ийн дээд хэмжээний уулзалтад бэлтгэх ажлыг үргэлжлүүлэх тухай санал нэгдсэн байна.