Умард Солонгос Япон тэнгисийн зүг урьд нь танигдаагүй хоёр ч сум харвалаа гэж Өмнөд Солонгосын Штабын дарга нарын нэгдсэн хорооны эх сурвалжаас авснаа Yonhap агентлаг дамжууллаа. Пуужинг Пенан-Намдо мужаас харвасныг цэргийнхэн тэмдэглээд “Манай цэргийнхэн нөхцөл байдлыг хянаж, дахиад пуужин харвасан тохиолдолд бэлэн байдалд байна” гэж хорооны мэдэгдэлд дурджээ.
Харин баллистик пуужин өөрийнх нь газар нутагт болон, эдийн засгийн бүсэд нь унасан ямар нэг мэдээлэл байхгүй байна хэмээн Японы Засгийн газар мэдээлснийг NHK телевиз дамжуулсан байна. Энэ удаагийн харвасан пуужин Японы аюулгүй байдалд нөлөөлөөгүй гэж Засгийн газар онцолжээ.

Наймдугаар сарын эцэс гэхэд Умард Солонгос нэг сарын дотор Япон тэнгисийн зүг долоон удаа пуужин харвасан юм. БНАСАУ олон дахин ашиглах өндөр хүчин чадалтай харвах суурь туршиж байна гэж Өмнөд Солонгосын мэдээллийн агентлаг мэдээлж байсан юм. Энэ туршилтын буудлагыг Умардын удирдагч Ким Чен Ун  биечлэн удирдсан байна.
БНАСАУ үүний өмнө Өмнөд Солонгос, АНУ-ын цэргийн хамтарсан цэргийн сургууль болж байгаатай холбогдуулан пуужин харваж туршсан гэж мэдэгдэж байсан ч энэ сургуулилт наймдугаар сарын 20-нд дууссан. Пуужин харваж байгааг нь эсэргүүцэж байгаагаа Японы Засгийн газар удаа дараа Умард Солонгост илэрхийлсээр байгаа юм. БНАСАУ ингэж удаа дараа пуужин харваж байгаа нь надад таалагдахгүй байна гэж АНУ-ын Ерөнхийлөгч Дональд Трамп  мэдэгдсэн юм.