ОХУ-ын Ерөнхийлөгч Владимир Путин оросын Хадгаламжийн банкны тэргүүнтэй уулзахдаа санхүүгийн системд томоохон шийдэл гаргахдаа технологийн дэвшил ялангуяа хиймэл оюун ухаан  ашиглахыг зөвлөсөн бол тус банкны тэргүүн Греф “Манай банкинд  ийм үүрэгтэй тусгай салбар байгаа” гэж хариулсан байна.
РБК хэвлэлийн мэдээлж байгаагаар бол Владимир Путин хиймэл оюун ухааныг Оросын эдийн засаг, төрийн удирдлага, банк, аж үйлдвэр, хөдөө аж ахуйн салбарт өргөн ашиглах боломжийг судалж байгаа юм байна.

Энэ асуудлыг бүр Кремльд болсон зөвлөгөөн дээр ч ярьж байжээ. Энэ удаагийн уулзалт дээр Хадгаламж банкны тэргүүн ч бас хиймэл оюун ухаан ашиглах, ялангуяа төрийн үйлчилгээ, хөдөлмөрийн бүтээмжийг дээшлүүлэхэд ашиглаж болох талаар Ерөнхийлөгчид ярьсан байна. “Бид өнөөдөр үүнд хөрөнгө оруулж байгаа. Ойрын үед манай орны иргэд, бидний түншүүд, өдөр тутмын амьдралдаа үр дүнг нь үзнэ гэдэгт бид итгэж байгаа” гэж Греф хэлсэн байна.
ОХУ-ын Хадгаламжийн банк хиймэл оюун ухааныг идэвхтэй ашиглаж байгаа юм. 2018 оны хоёрдугаар сард тус банк үл хөдлөх хөрөнгийн үнэлгээнд шинжилгээ хийх сүлжээндээ хиймэл оюун ухаан ашигладаг гэв. Банкны гурван жилийн стратеги төлөвлөгөөгөөр бол 2020 он гэхэд Хадгаламжийн банк өөрийн экосистем бий болгож технологийн иж бүрэн компани байгуулах юм байна.
Гэхдээ л энэ оны хоёрдугаар сард тус банк хиймэл оюун ухаанаас болоод хагас тэрбум рубль алдсан гэж Греф улсын ерөнхийлөгчид мэдээлсэн байна. Банкны хэвлэлийн алба энэ талаар бас ч шууд алдагдал биш “Харин авч амжаагүй байгаа ашиг” гэсэн юм.