Өнгөрсөн наймдугаар сард Гонконгт жуулчилсан гадаадын иргэдийн тоо 40 хувь буурлаа гэж Гонконгийн санхүүгийн нарийн бичгийн дарга Пол Жань мэдээлсэн байна. Тэр энд өрнөөд байгаа эсэргүүцлийн хөдөлгөөнөөс болоод жуулчдын урсгал гурав дахь сардаа унаж байна гэж мэдэгджээ.
“Хэргийн учир нь эсэргүүцлийн хөдөлгөөнийхөн нисэх буудал, авто замыг бүслэн хааж, цагдаагийнхантай мөргөлдсөөр байгаа нь Гонконгийн аюулгүй хот гэсэн олон улсын нэр хүндийг унагаж, санхүү, худалдаа, нисэх, ер нь орон нутгийн эдийн засаг, аялал жуулчлалын салбарыг  сүйрүүлж байна” гэж  Жань өөрийнхөө блогт бичжээ.
Сэжигтэн, гэмт хэрэгтнийг эх газрын хятадад шилжүүлэн өгөх хуулийн төслийг эсэргүүцэж Гонконгийн иргэд гудамжинд гаран эсэргүүцлээ илэрхийлж эхэлсэн бол эрх баригчид энэ хуулийн төслийг хэлэлцэхээ больж татан авсан ч гэсэн эсэргүүцэл үргэлжилсээр байгаа юм. Зургадугаар сараас эхэлсэн энэ хөдөлгөөний үеэр хууль сахиулагчид мянга гаруй хүнийг саатуулаад байгаа юм.