Оросууд цөмийн хөдөлгүүр бүхий “Буревестник” далавчит пуужинг хамгийн багаар бодоход таван удаа туршсан гэж АНУ-ын тагнуулын алба тогтоосныг тусгай албаны эх сурвалжаас авсан хэмээн CNBC хэвлэл мэдээллээ. Эдгээрийг 2017 оны арваннэгдүгээр сараас 2018 оны хоёрдугаар сарын хооронд харваж туршсан гэж уг эх сурвалжид дурджээ. 2019 он гараад бас нэг удаа туршсан байна. Гэхдээ бүх туршилт ослоор төгсчээ. Эх сурвалжийн хэлснээр пуужин хамгийн удаандаа хоёр минут нисч хоёр миль буюу 35 орчим км нисээд хяналтаас гарч сүйрсэн байна. Хамгийн богино нь ердөө дөрвөн секунд ниссэн байна. Оросууд ийм “Буревестник” пуужинг 2025 он гэхэд байлдааны бэлэн байдалд оруулах гэж байна хэмээн АНУ-ын тагнуулын алба үзэж байна.

Северодвинскийн цэргийн буудлагын талбайгаас  наймдугаар сарын 8-нд пуужин харвах үеэр дэлбэрэлт болж  долоон хүн нас барсан юм. Энэ нь пуужинг далайн ёроолоос харвах үед туршилт амжилтгүй болж усанд унасан гэж Америкийн тусгай алба үзэж байна. Албан ёсны мэдээллээр бол изотопоор цэнэглэдэг шингэн тийрэлтэд хөдөлгүүрийн суурийг турших үед дэлбэрсэн гэдэг. Энэ үеэр “Росатом”-ын таван ажилтан, Батлан хамгаалах яамны хоёр төлөөлөгч нас барсан юм. Дэлбэрэлтийн дараагаар гамма туяаны байх хэмжээ 4-16 дахин нэмэгдсэн ч тун удалгүй багассан байна. Цөмийн хараат бус шинжээч, “Атоминфо”-гийн тэргүүн Александр Уваровагийн хэлж байгаагаар бол дэлбэрэлтийн  дараа цацрагийн түвшин нэмэгдсэн боловч нутгийн иргэдэд аюул учрахааргүй байсан байна.