ОХУ-ын Буриадын нийслэл Улан-Үдэ хотод Зөвлөлүүдийн ордны үүдний  талбайд автобус байрлуулж, цагдаагийн ажилтнуудын өмнөөс эсэргүүцэл үзүүлэн  нулимс асгаруулагч хий хэрэглэсний төлөө 17 хүнийг хууль сахиулагчид  баривчиллаа гэж Буриадын Дотоод хэргийн яам мэдээлсэн байна.
Өнгөрсөн ням гарагт Улан-Үдэ хотын захирагчийн сонгууль болж  бие даан нэр дэвшигч, өнөөгийн хотын захиргааны тэргүүний үүрэг гүйцэтгэгч Игорь Шутенков 52.5 хувийн саналаар ялсан бол хоёрдугаарт Эрхүү мужийн сенатч, Оросын коммунист намаас нэр дэвшсэн  Вечяслав Мархаев 36.5 хувийн санал авчээ.

Үүний улмаас сонгуулийн дүнг эсэргүүцсэн тайван жагсаал Зөвлөлүүдийн талбайд болсноос зөвшөөрөлгүй жагсаал цуглаан зохион байгууллаа хэмээн хууль сахиулагчид хоёр ч идэвхтнийг саатуулжээ.
Халхын голын ялалтын 80 жилийн ойг тэмдэглэх хүрээнд Зөвлөлүүдийн талбайн орчмоор тээврийн хөдөлгөөнийг есдүгээр сарын 12-ноос 15-ны өдрийг хүртэл хориглоод байсан юм.
“Есдүгээр сарын 12-ны 02.00 цагийн орчимд Зөвлөлүүдийн талбайд нэвтрэх явган зам дээр автобус зогсоосон байсан. Замын цагдаагийн ажилтан тэдэнд машинаа холдуулах шаардлага тавьсан ч иргэд түүний хууль ёсны шаардлагыг үл хэрэгсэн эсэргүүцэл үзүүлж, нулимс асгаруулагч хий хэрэглэсэн байна” гэж Дотоод хэргийн яамны мэдээлэлд дурджээ.
“Үүнтэй холбогдуулан цагдаагийнхан болон Оросын гвардийн ажилтнууд 17 хүнийг саатуулан, автобусыг журмын хашаанд хүргэсэн” гэж уг мэдээлэлд дурдсан байна. Саатуулсан хүмүүсийг байцаан хэн болохыг нь тогтоогоод сулласан гэжээ.