Зимбабве улсын нийслэл Хараре хотод өнгөрсөн бямба гарагт тус улсыг 35 жил удирдсан Роберт Мугабетэй салах ёс гүйцэтгэв. Зимбабвегийн Ерөнхийлөгч агсан Роберт Мугабегийн шарилыг Үндэсний цэнгэлдэх хүрээлэнд хүргэж, тэнд салах ёс гүйцэтгэх ёслол болжээ. Шарилыг цэнгэлдэхэд хүргэхэд араас нь тус улсын одоогийн төрийн тэргүүн Эмерсон Мнангагва, цэргийнхэн, талийгаачийн төрөл төрөгсөд дагаж явсан байна. 

Мугабетэй салах ёс гүйцэтгэхэд Африкийн олон орны удирдагчид, түүний дотор ӨАБНУ болон Кенийн Ерөнхийлөгчид иржээ. Салах ёс гүйцэтгэхэд Зимбабвегийн олон мянган иргэд оролцсон байна. Цугларсан энгийн иргэд хашлагыг эвдэж, Мугабегийн шарилыг ойроос харахын тулд талбай руу гүйлдсэн байна. Анхандаа экс Ерөнхийлөгчийн шарил руу төрөл төрөгсөд, эрх бүхий албан тушаалтнуудыг л оруулахыг зөвшөөрч байжээ. Гэтэл олон хүн бужигнасан үймээнээр шахцалдаан үүсч, нэлээд хэдэн хүн гэмтэж бэртсэн байна. Тэдний заримд нь эмнэлгийн яаралтай тусламж үзүүлжээ
Роберт Мугабег оршуулахгүй бөгөөд түүний шарилыг удахгүй ашиглалтад орох тусгай бунханд байрлуулах юм байна. Зимбабве улсын Ерөнхийлөгч агсан Роберт Мугабег хаана нутаглуулах вэ гэдэг асуудалд тус улсын төр засаг болон ар гэрийнхэн нь багагүй маргалдсан юм. Зимбабве улсын Засгийн газар анхны Ерөнхийлөгчөө нийслэл Харара хотын Үндэсний баатруудын акрт оршуулна гэсэн бол эхнэр Грэй Мугабе нь төрсөн нутагт нь, даруухан байдлаар нутаглуулна гэжээ. Мугабегийн төрөл төрөгсөд одоогийн Ерөнхийлөгчийг түүнээс урвасан хэмээн буруутгадаг аж.
2017 онд цэргийн эргэлтээр засгийн эрхээс огцорсон Роберт Мугабе энэ сарын 6-нд Сингапурын нэгэн эмнэлэгт 95 насандаа таалал төгссөн юм. Түүний цогцсыг энэ сарын 11-ний лхагва гарагт Зимбабве улсад авчирсан байна. 

Роберт Мугабег Ерөнхийлөгчид байхад нь түүнийг ардчиллыг нухчин дарсан, цагаан арьстнуудыг улсаасаа хөөсөн, улсынхаа эдийн засгийг хямралд оруулсан хэмээн буруутгаж байв. Тэрбээр Зимбабвег удирдаж байхдаа тус улсад инфляц хоёр сая хувьд хүрч, ард иргэдийн 90 хувь нь ажилгүй болжээ. Роберт Мугабе 1980 онд Зимбабвегийн Ерөнхийлөгч болж, тус улсыг 35 жил удирдсан.