Аль-Кайда террорист бүлэглэлийн толгойлогч асан Осама Бин Ладены хүүг хөнөөсөн байна. Уг мэдээллийг АНУ-ын Ерөнхийлөгч Дональд Трамп баталгаажууллаа. 30 настай Хамза Бин Ладеныг АНУ-ын тусгай ажиллагааны үеэр хөнөөсөн гэнэ. Цагаан ордны тэргүүний мэдэгдэлд, Хамза Бин Ладен нь “Аль-Кайда” бүлэглэлийн чадварлаг, чухал удирдагч гэхээсээ илүү эцгийнхээ нэрээр бэлгэдлийн ач холбогдолтой байсныг онцолсон байна. Гэхдээ тэрбээр АНУ-ын тусгай ажиллагаа явуулсан цаг хугацааг тодорхой мэдэгдээгүй аж. Өнгөрсөн наймдугаар сард АНУ-ын хэвлэлүүд Хамза Бин Ладеныг агаарын дайралтын үеэр амь үрэгдсэн хэмээн мэдээлж байв. Хамза Бин Ладеныг АНУ-аас 2017 онд “террорист” хэмээн нэрлэсэн юм. Түүнийг эцгийнхээ орыг залган аль-Каида бүлэглэлийн толгойлогч болох магадлалтай хэмээн үзэж байв. Түүний тухай мэдээлэлд АНУ-ын засгийн газраас нэг сая ам.долларын шан харамж амлаад байв. Хамза бен Ладен интернэтээр дамжуулж аудио болон видео бичлэгээр АНУ-ын эсрэг халдахыг уриалж байв.

АНУ-д Осама Бин Ладеныг 2001 оны есдүгээр сарын 11-нд болсон террорист халдлагыг зохион байгуулсан хэмээн үздэг. Уг халдлагын улмаас гурван мянга гаруй хүн амь үрэгдэж байжээ. Осама Бин Ладеныг АНУ-ын тусгай албад 2011 оны тавдугаар сард Пакистанд устгасан.