Йемений умард нутагт засгийн эрхийг булаан аваад байгаа босогчдын “Ансар Аллах” хөдөлгөөнийхөн Саудын Арабын нефтийн байгууламж руу халдсаныхаа дараа Арабын нэгдсэн Эмиратын гол хотууд болох Дубай, Абу-Даби хотуудад цохилт өгнө гэж сүрдүүлж байна. “Бидний Арабын нэгдсэн Эмират руу дайрах байнуудад эхний ээлжинд Абу-Даби, Дубай хотууд орж байгаа. Бид хэзээ л бол хэзээ тохиромжтой цагт тийшээ халдах болно” гэж Хуситын зэвсэгт хүчний төлөөлөгч генерал Яхья Сариа “Аль-Жазира” телевизээр үг хэлэх үеэрээ мэдэгджээ.
Манай гаргийн нефтийн гурав дахь гол экспортлогч Саудын Арабын газрын тос олборлож боловсруулагч байгууламж руу есдүгээр сарын 14-ний шөнө нисгэгчгүй төхөөргийн тусламжтай халдсанаар нефть олборлох хэмжээ нь 50 хувь буурч энэ нь дэлхийн зах зээлд нөлөөлөн газрын тосны үнэ огцом өссөн юм.

Газрын тосны нөөцөө ашигласны дүнд нефть нийлүүлэх хэмжээ өмнөх түвшиндээ хүрч, алдагдлын тал хувийг сэргээгээд байна гэж Саудын Арабын эрчим хүчний сайд есдүгээр сарын 17-нд мэдэгдсэн байна.
Саудын Араб тэргүүтэй Арабын эвслийн эсрэг байлдаж байгаа Йемений босогч хуситууд энэ халдлагыг нисгэгчгүй төхөөргийн тусламжтайгаар үйлдсэн гэж хүлээгээд байгаа ч АНУ-ын Төрийн нарийн бичгийн дарга Майк Помпео болохоор энэ халдлага дайралтыг Йемений зүгээс үйлдсэн гэх ямар ч баримт нотолгоо байхгүй байна гээд харин энэ хэрэгт Ираныг буруутгаж байгаа юм. Ираны Гадаад хэргийн яам харин М.Помпеогийн буруутгалыг няцаасаар байгаа юм.