Германы зэвсэгт хүчин, германы НАТО дахь холбоотнууд Оросын эсрэг дайнд бэлтгэж байна гэж Junge Welt хэвлэл есдүгээр сарын 17-нд бичсэнийг Оросын ТАСС дамжуулсан байна. Хэвлэлд бичсэнээр бол Оросын эсрэг “шуурхай байрлуулах хүчин”, ар талаас хангалтын болон тээвэр дэд бүтцийн НАТО-гийн командын шинэ төвийг Германы Ульм хотод байгуулж байгаа гэнэ.

Энэ төвийг 2021 оноос хойшлуулахгүйгээр байлдааны бэлэн байдалд оруулахын тулд нэг жилийн өмнөөс байгуулж эхэлжээ. Энэ бүтэц нь НАТО-гийн цэрэг, техникийг бүхий л Европт байршуулах зориулалттай юм. Үүний зэрэгцээ АНУ өөрийнхөө 3.5 мянган цэргийг хоёр мянга гаруй техниктэйгээр Германаас дамжуулан Польшид байгуулахад бэлтгэж байна. Танк, явган цэргийн байлдааны машин орсон энэ хүчийг байрлуулах ажиллагаа аравдугаар сарын дундуур эхэлнэ гэж байгаа юм. Энэ хүч нь Европт болсон цэргийн есөн сарын ажиллагааны дараа АНУ-д эргэн очсон цэргийн салбаруудын цэрэг зэвсгийн тоотой ойролцоо байж, тэднийг орлох юм.

Үүнээс гадна АНУ-ын армийн Виржини мужийн Норфолк дахь командын төв нь Атлантикаар дамжуулан цэрэг техник илгээх ажлыг хянах юм. Ганцхан энд “АНУ-ын цэргийн хүнд техник”-ийг тээвэрлэхэд Европын зам, дэд бүтэц нь бэлэн биш байгаа нь бэрхшээл учруулж байгаа аж. Зам гүүр, газар доогуурх гарц нь цэргийн техникүүдийн дамжин өнгөрүүлж чадахааргүй, хүчин чадал нь хүрэлцэхгүй гэж сонинд бичсэн байна.

Үүний өмнө Оросын хил дээр өөрийнхөө хүчийг нэмэгдүүлээч гэж Литва бас НАТО-гоос хүсч байсан юм. Балти орчмын энэ улсын тэргүүн Гитанас Науседа НАТО-гийн өнөөдөр байгаа хүч нь “Москвагийн болзошгүй довтолгооноос” хамгаалахад хангалтгүй гэж мэдэгдсэн юм.
НАТО-гийн орнууд “оросын аюул” гэдгийг ОХУ-ын ойролцоо хүчээ байрлуулахын тулд бодож зохиож байна хэмээн Оросын Засгийн газар удаа дараа мэдэгдэж байгаа. ОХУ-ын Батлан хамгаалахын сайд Сергей Шойгу өнгөрөгч наймдугаар сарын 21-нд баруун хил түгшүүртэй байна гэж мэдэгдсэн юм.