Сарны өмнөд хэсэгт 2024 он гэхэд хүн буулгах асуудлыг Америкийн сансар судлалын төв НАСА зургаан сарын турш хэлэлцэж байна. АНУ-ын Дэд Ерөнхийлөгч Майк Пенсийн өнгөрсөн гуравдугаар сард мэдэгдсэнээр бол өмнө нь 2028 он гэж байсныг бодоход энэ бол хамгийн цаад хугацаа гэнэ. Энэ төслийг америкчууд Artemis хөтөлбөр гэж нэрлээд байгаа юм. НАСА үүний зэрэгцээ сансрын экспедицэд эмэгтэй нисэгч оролцуулахаар төлөвлөж байгаа юм. Шахуу төлөвлөгөө хэдий ч НАСА энэ бүхнийгээ 2024 он гэхэд хэрэгжүүлнэ гэж найдаж байна.

Энэ есдүгээр сарын 12-нд Алабама мужийн Хантсвиллд болсон зөвлөгөөн дээр Грег Чейверс НАСА-гийн энэ төлөвлөгөөний анхны хувилбарыг танилцуулсан байна. Тэрээр “Бид 2024 оныг маш чухал хугацаа гэж үзэж байгаа. Тодорхой өдрийг бид төлөвлөөгүй байна” гэж Чейверс хэлээд “Бид 2024 оны хоёрдугаар хагас гэж төлөвлөж байгаа. Энэ бол харьцангуй хүрэлцэхүйц хугацаа” гэсэн байна.
Энэ хугацаанд хэрэгжүүлэхээр олон төсөл НАСА-д байгаа. Гэхдээ энэ хөтөлбөрт хэрэглэнэ гэсэн Space Launch System пуужин нислэгт хараахан бэлэн болоогүй байгаа, тэгээд ч Орион капсул нь хэзээ ч нисэгчдийн багтай хөөрч байгаагүй. Мөн энэ агентлагт сансрын нисэгчид саран дээр ажиллахад зориулсан шинэ хувцас хэрэгтэй, сарны өмнөд хэсэгт нисэгчид буулаа гэхэд богино хугацаанд тэнд ажиллах байгууламж хэрэгтэй болно.

Энэ зорилтоо ийм богино хугацаанд хэрэгжүүлэхийн тулд Чейверс болон түүний багийнханд төслийн төлөвлөгөө, зарим шаардлагыг өөрчлөх шаардлага гарч байгаа юм. “Бид аль болох хурдан хэрэгжүүлэхийг эрмэлзэж байна” гэж Чейверс хэлжээ.