Египетийн хэд хэдэн хотод тус улсын Ерөнхийлөгч Абдель Фаттах аль-Сисиг огцрохыг шаардсан эсэргүүцлийн жагсаал болов. Эсэргүүцлийн жагсаал цуглаанд олон зуун хүн оролцжээ. Египетийн эдийн засаг, хүний эрхийн төвийн мэдээлснээр есдүгээр сарын 21-нд цагдаагийнхан олон арван хүнийг баривчилсан байна. Тэдний дунд хоёр сэтгүүлч байгаа гэнэ. Гудамжинд гарсан жагсагчдын эсрэг цагдаа нар нулимс асгаруулагч ашиглаж хүчээр тараажээ.
Хэд хоногийн өмнө одоогийн эрх баригчдын сөрөг хүчин болох, тус улсаас саяхан гадагшаа зугтсан бизнесмэн Мухаммед Али интернэтээр ард түмэнд хандаж гудамжинд гарч, эсэргүүцлийн жагсаал хийхийг уриалсан байна. Тэрбээр Засгийн газар, цэргийнхнийг “авлигад идэгдсэн” гэж буруушаажээ. Харин Ерөнхийлөгч аль-Сиси түүний мэдэгдлийг няцаасан байна. Мухаммед Али интернэтээр уриалга гаргасны дараа ард иргэд гудамжинд гарч эсэргүүцлийн жагсаал зохион байгуулж, эрх баригчдад шаардлага тавьжээ. Ажиглагчдын үзэж буйгаар ард иргэдийн эсэргүүцлийн хөдөлгөөнд эрх баригчдыг шүүмжилсэн идэвхтнүүдийг хавчиж байгаа нь бас шалтаг болсон гэнэ.
Өмнө нь генерал байсан одоогийн Ерөнхийлөгч Абдель Фаттах аль-Сиси эрх барьж байх хугацаанд Египетэд хүний эрх ихээр зөрчигдөж байгаа аж. Human Rights Watch олон улсын байгууллагаас Египетийн эрх баригчдад иргэдийн жагсаал цуглаан хийх эрхийг нь хамгаалахыг уриалсан байна.