Бээжинд улсын хэвлэл, мэдээллийн байгууллагуудад ажиллаж байгаа сэтгүүлчид марксизм-ленинизм болон Ши Жиньпины бүтээлээр шалгалт өгөхөөр болжээ. Шалгалтад ойролцоогоор арван мянга гаруй сэтгүүлч оролцох юм байна. Тус шалгалтад унасан сэтгүүлчид мэргэжлээрээ ажиллах боломжгүй болох аж. Энэ тухай Хонгконгод гардаг “South China Morning” сонин Коммунист намын хэвлэлийн хянан шалгах хорооны мэдээллээс эш татан мэдээлжээ. Шалгалт өгч тэнцсэн сэтгүүлчид шинэ үнэмлэх гардаж авна. Сэтгүүлчдэд шалгалтыг давахад хоёр боломж олгоно. “South China Morning” сонинд нийтэлснээр сэтгүүлчдийн намын удирдагчид хэр зэрэг үнэнч болохыг нь шалгах аж. Таван хэсгээс бүрдэх тестийн шалгалтын хоёр хэсэг нь Ши Жиньпины бүтээлүүдээс бүрдэх юм байна.
Бээжин хотын сэтгүүлчдийн дараа орон нутгийнхныг бас шалгах аж. Судлаачид БНХАУ-д сүүлийн үед нэг хүнийг тахин шүтэх үзэл хүчээ авч буйг шүүмжилдэг. 2018 онд тус улсын Үндсэн хуульд өөрчлөлт оруулж Ши Жиньпинд хоёроос илүү сонгогдох эрх өгсөн.