Америкийн Луизиана мужийн нэгэн эр Танзанид найз бүсгүйтэйгээ хамт амарч байхдаа усан дор гэрлэх санал тавьжээ. Гэвч тэрбээр амьсгалаа барьж дийлэлгүй живсэн байна. Стивен Вебер, Кенеша Антуан нар Пемба арлын ойролцоо усан доорх унтлагын өрөө бүхий кабинд байрлаж байсан гэж Танзани дахь эх сурвалжууд мэдээлжээ. Вебер унтлагын өрөөний цонхонд өөрийн гараар бичсэн зурвас бүхий цаасаа наан, бөгж бэлэглэж гэрлэх санал тавьсан байна. Уг үйл явдал өнгөрсөн пүрэв гарагт болсон ба энэ тухай бичлэгийг Антуан баасан гарагт Фэйсбүүк хуудсандаа нийтэлжээ. Веберийн тунгалаг гялгар уутанд хийсэн цаасан дээр “Чамд хайртай тухай бүхнийг хэлэх гэвч би амьсгалаа удаан барьж чадахгүй. Гэхдээ би чиний бүх зүйлд хайртай, өдөр бүр улам их хайртай болж байна... Чи миний эхнэр болох уу? Надтай гэрлээч?” хэмээн бичжээ. Хосуудын байрлаж байсан “Манта” амралтын газраас бямба гарагт залуугийн үхлийг албан ёсоор баталжээ.