Өнгөрсөн амралтын өдрүүдэд “Тапа” хар салхи Япон болон Өмнөд Солонгосыг дайран өнгөрөв. Японд хар салхины улмаас 21 хүн гэмтэж, 6000 орчим өрх гэрэл цахилгаангүй болжээ. Хокүрикү, Тохокү бүс нутгийг чиглэн урагшилж буй “Тапа” хар салхи Японы хойд нутгийн Хоккайдо арлыг дайран өнгөрөх төлөвтэй байна гэж Японы Цаг уурын агентлаг мэдээлжээ. Мөн төмөр замын үйлчилгээ тасалдаж, 200 гаруй нислэг цуцлагдсан байна.
Хар салхины нөлөөгөөр баруун нутгийн Шикокү аралд 300 миллиметр, төвийн хэсгийн Токай бүс нутагт 200 миллиметр, хойд нутгийн Кюшү аралд 180 миллиметр хүртэлх хэмжээний хур тунадас унах төлөвтэй байгаа ажээ. Японд энэ сарын эхээр “Faxai” нэртэй хар салхи дэгдэж, нэг сая орчим айл өрх гэрэл цахилгаангүй болж, 130 гаруй нислэг цуцлагдсан юм.

“Тапа” хар салхи нь БНСУ-ын нутаг дэвсгэрийг мөн дайран өнгөрсөн бөгөөд 30 хүн гэмтэж бэртжээ. Гэмтэж бэртсэн хүмүүсийн дунд гурван цагдаагийн ажилтан болон гал сөнөөгч байжээ. Мөн шуурганаас үүдэлтэй ослын улмаас гурван хүн нас барсан хэмээн олон нийтийн хэвлэл мэдээллийн хэрэгслүүд мэдээлсэн боловч тэдний нас барсан шалтгаан “Тапа” хар салхитай холбоогүй байсан байна. Тус улсын өмнөд нутагт хамгийн их хохирол учирчээ.
Байгалийн гамшигт нэрвэгдсэн бүсүүдэд гамшгийн уршгийг арилгах ажиллагаа үргэлжилж, 11800 гаруй гал сөнөөгчийг дайчлан ус шавхах зэрэг аюулгүй байдлын арга хэмжээнүүдийг авч хэрэгжүүлж байгаа аж. Хүчтэй салхины улмаас 11 нисэх буудлын 248 нислэг цуцлагдсан байна. Олон хүнийг гэмтээж, олон зуун нислэгийг цуцлахад хүргэсэн “Тапа” хар салхины учруулсан хохирлыг арилгахаар ажиллаж байна гэж албаны хүмүүс мэдээлжээ.

БНСУ-ын өмнөд нутагт хамгийн их хохирол учирсан бөгөөд 60 орчим зам үерийн усанд автаж, 70 замын тэмдэг, гэрлэн дохио эвдэрч сүйджээ. Түүнчлэн олон нийтийн болон хувийн байгууламж эвдэрсэн талаарх 600 орчим дуудлага бүртгэгдсэн байна.
Даваа гаргийн өглөөний байдлаар бүх чиглэлийн нислэг хэвийн үргэлжилж эхэлсэн бөгөөд цахилгаан хангамж тасалдсан 27 мянган өрхийн цахилгааныг сэргээжээ.